Мансабында алғаш рет: Қазақстан құрамасының көшбасшысы марапатқа ие болды

Қазақстан құрамасы мен грозныйлық "Ахматтың" көшбасшысы Максим Самородов Ресей премьер-лигасында алғаш рет матчтің үздік ойыншысы атанды, - деп хабарлайды Tengri Sport.

Қазақстандық футболшы маусымның "Сочиге" қарсы соңғы матчінде негізгі құрамда алаңға шығып, командасының 1:1 есебімен тең түсуіне септігін тигізді.

Сарапшылар Самородовты кездесудің үздік ойыншысы деп танып, оған естелік мүсіншені табыстады.

"Екі маусым ішінде алғаш рет үздік ойыншы марапатын алу өте жағымды", - деді Максим клубтың баспасөз қызметіне берген сұхбатында.

Естеріңізге сала кетейік, Самородов 2024 жылдың тамызында "Ақтөбеден" "Ахматқа" ауысып, содан бері команда көшбасшыларының біріне айналды.

Биыл оның еншісінде 29 матчте 5 гол мен 10 нәтижелі пас бар.

Сонымен қатар, Самородов - Қазақстан құрамасының негізгі ойыншыларының бірі. Ол ұлттық құрама сапында 31 матч өткізіп, төрт гол соққан.