“Медаль таққандарға қарай алмаймын“: Азиада алтынынан айырылған қазақстандық спортшы

Фото: ҰОК/ Арлан Олжаба

Қазақстандық жеңіл атлет Ясмина Тоқсанбаева Азия ойындарында айырылып қалған медалі үшін әлі де уайымдайтынын, бірақ ел қоржынына бұдан да жоғары мәртебелі марапат салуға дайын екенін айтты, деп хабарлайды Tengri Sport.

Әлеуметтік желідегі оқырмандарының болашақ жоспары туралы сауалдарына жауап бере отырып, спортшы Азиада жеңімпазы атанғандарға әлі күнге дейін жайбарақат қарай алмайтынын жеткізді.

Азия ойындарынан кейінгі жоспарыңыз қандай?

"Психологиялық тұрғыдан қалпыма келу! Медаль таққан спортшыларға жайбарақат қарай алмаймын. Оң тізе буынындағы жарақатты емдеу керек және, әрине, өз медалімді алу. Тек бұл жолы әлемдік деңгейдегі - 2027 жылғы Әлем чемпионатында (Бейжің, Қытай)", - деді спортшы.

Ясмина Тоқсанбаева деген кім және оған не болды?

Еске сала кетейік, 21 жастағы қазақстандық қыз спорттық жүріспен айналысады және 20 шақырымдық қашықтықта Азия чемпионатының күміс пен қоласын жеңіп алған. Биылғы Азия ойындарында ол 42 шақырымдық марафонға қатысып, барлық қарсыласынан озып шықты.

Жарыс аяқталғаннан кейін Ясмина чемпион атанбайтыны белгілі болды. Оның аяқ киімі регламентке сәйкес келмеген. Осылайша қазақстандық спортшы жарыстан шеттетілді.

Қазақстан кроссовка үшін Азиада алтынынан айырылды: кім жауапқа тартылады?

Тоқсанбаеваның нәтижесі жоққа шығарылғанына қарамастан, Жеңіл атлетика федерациясы оған тиісті сыйақы толық көлемде төленетінін мәлімдеді.