Михаил Шайдоров бапкері ауысатынын айтты

Фото: ҰОК/ Сали Сабиров

Мәнерлеп сырғанаудан қазақстандық Олимпиада чемпионы Михаил Шайдоров бапкері Алексей Урмановпен ынтымақтастығын тоқтатты, деп хабарлайды Tengri Sport спортшының әлеуметтік желідегі парақшасына сілтеме жасап.

22 жастағы мәнерлеп сырғанаушы Урмановпен жұмыс істеу кезеңі аяқталғанын айтты.

"Алексей Евгеньевичпен ынтымақтастығымыз мәресіне жеткенін айтқым келеді. Осыдан біраз уақыт бұрын 12 жастағы бала кезімде оған үлкен арманмен, өз күшіме сеніммен және табысқа жетуге құштарлықпен оқу-жаттығу жиынына барған едім. Осылайша кезінде көпшілік сене қоймаған белестерді бағындырған командаға айналдық.

Осы жылдар ішінде талай қиындықты еңсердік, құлап, жарақат алудан өттік, жеңіс қуанышы мен қиын сәттерді бірге бөлістік. Бірақ ең бастысы - осы жолда бапкерімнің өз спортшысына сенетінін сезіндім", - деді спортшы.

Мәнерлеп сырғанаушының айтуынша, алда оны жаңа кезең күтіп тұр.

"Өмір жолымда осындай адамды - маған ең жоғары нәтижелерге жетуге көмектескен тамаша жаттықтырушы, тәлімгер және шабыттандырушыны кездестіргеніме ризамын. Алексей Евгеньевичке бірге өткен жолымыз үшін, оның еңбегі, қолдауы мен сенімі үшін алғыс айтамын. Бүгін біз бұл кезеңді кезінде мен армандауға да батпаған жетістіктермен аяқтап отырмыз.

Әрі қарай жылжитын уақыт келді. Алда жаңа кезең күтіп тұр, ол оңай болмауы, кейде қорқынышты көрінуі мүмкін, бірақ онда міндетті түрде жаңа мақсат пен сынақ болады. Мен өз елімді жоғары деңгейде лайықты таныту үшін бұрынғыдай тынбай жұмыс істей беремін", - деп атап өтті Шайдоров.

Instagram-дағы бұл жарияланымды көру

MIKHAIL SHAIDOROV (@mikhail_shaidorov) жарияланымы

Бұған дейін Алексей Урмановпен келісімшарт бұзылғаны туралы Қазақстанның туризм және спорт министрі Ербол Мырзабосынов айтқан. Шайдоровты тарихи алтынға бастап барған маманмен келісімшарт тоқтатылды, деді спорт министрлігінің басшысы.

"Алексей Урмановпен келісімшарт бұзылды. Біз өз тарапымыздан Алексей Урмановқа, өзі Олимпиада алтынын иеленіп, Олимпиада чемпионын дайындауға көмектескен адамға алғыс айтамыз.

Осы үш жыл ішінде Михаилдың командасымен ауқымды жұмыс атқарылды. Өз тарапымыздан Алексей Урманов біздің жаңа буынмен де жұмыс істейді деп үміттенеміз. Біз Олимпиада ойындарынан кейін Алексей Урмановпен тығыз байланыстамыз. Федерация тарапынан оған Алматыда пәтер сыйға тартылды", - деді министр ОКҚ-да өткен брифингте.

Сондай-ақ ол Шайдоровтың қай командамен жұмысты жалғастыратынын өз бетінше шешуге құқығы бар екенін атап өтті.

"Олимпиада чемпионымыз Михаил Шайдоровқа келсек, оның жаңа циклі басталды, жыл басынан бері 13 оқу-жаттығу жиынын өткізді, төрт-бес жарысқа қатысты, бұл жаңа кезең және біз Михаилды әрдайым қолдаймыз. Қазір ол Олимпиада чемпионы ретінде жаңа команда таңдап, олармен жұмыс істеуге құқылы", - деді Мырзабосынов.

Олимпиададан кейін Шайдоровтың нәтижесі төмендеді

Еске сала кетейік, Михаил Шайдоров Олимпиада ойындарының тарихи алтынын жеңіп алғаннан кейін Әлем чемпионатына қатыспай, жарыс жолына 2026 жылдың жазында оралған.

Жаңа маусымға дайындық үшін мәнерлеп сырғанаушы АҚШ-қа барып, белгілі бапкер Рафаэль Арутюнянмен жұмыс істегені белгілі. Дегенмен, осы маман Шайдоровтың жаңа жеке бапкері болатыны ресми түрде әлі жарияланған жоқ.

Күзден бері Шайдоров бірде-бір турнирде жеңіске жете алмады: ол Братиславадағы Ондрей Непела мемориалында үшінші, Қытайдағы әлемдік Гран-при кезеңінде бесінші және Франциядағы кезеңде 10-шы орын алды. Бұл ретте оның ұпай саны бірде-бір рет 275-ке жетпеді, Олимпиадада ол 292 ұпай жинаған болатын.

Instagram-дағы бұл жарияланымды көру

Kazakhstan Olympic Team (@olympickz) жариялаған жазба

“Самұрық-Қазына“ ісі: Жақыпов қамауға алынғаннан кейін де қызметтерінің бірін сақтап қалған

Пікірлер