Мүгедектігі бар спортшы паракаратэ федерациясы басшысын алаяқтық жасады деп айыптады: іс қайта жанданды

Мүгедектігі бар спортшылар Жетес Нұрмағамбетов пен Айжан Бекмұрат Tengri Sport-қа берген сұхбатында жұмыстан шығып кету қаупінен кейін жалақыларының бір бөлігін паракаратэ федерациясының басшысы көрсеткен тұлғалардың есепшотына аударып келгендерін айтты.

Олар полицияға жүгінгеннен кейін ақшалары қайтарылған, алайда департамент қылмыс құрамының болмауына байланысты істі жауып тастаған.

Біз прокуратураға параспортшылардың арызы неге назардан тыс қалғанын нақтылауды сұрап жүгіндік. Біздің сауалымызға олар қазіргі уақытта іс бойынша сотқа дейінгі тергеу қайта жүргізіліп жатқанын хабарлады.

"Астана қаласы Полиция департаментінің "Сарыарқа" ауданының полиция басқармасы (бұдан әрі – "Сарыарқа" ауданының ПБ) А.Н. Бекмұрат пен Ж.С. Нұрмағанбетовтің алаяқтық дерегі негізінде М.Д. Дүкүеваға қатысты шара қолдану туралы арыздары бойынша Сотқа дейінгі тергеп-тексерулердің бірыңғай тізілімінде (бұдан әрі – СДТБТ) №267113031000918 болып тіркелген Қазақстан Республикасы Қылмыстық кодексінің 190-бабы (алаяқтық) бойынша қылмыстық іс шеңберінде сотқа дейінгі тергеу амалдарын жүргізіп жатыр.

Қазақстан Республикасы Қылмыстық-процестік кодексінің 201-бабының 1-бөлігіне сәйкес сотқа дейінгі тергеп-тексеру деректері жария етуге жатпайды. Осыған байланысты қазіргі уақытта қылмыстық іс бойынша жиналған дәлелдемелердің мазмұны, жүргізіліп жатқан тергеу әрекеттері, сондай-ақ сотқа дейінгі тергеп-тексерудің өзге де мәліметтері жарияланбайды", - деп жауап берді елордалық прокуратура біздің сауалымызға.

Осылайша, істің қайта жаңартылғаны туралы қорытынды жасауға болады.

150 мың теңге жалақыдан 50 мың теңгеден төлеп отырған

Еске сала кетейік, Жетестің айтуынша, ол Астана паракаратэ федерациясына жұмысқа орналасқаннан кейін бірнеше ай өткен соң, одан қайырымдылық жасауды сұраған.

"Маған келіп, аз қамтылғандарға көмек көрсету керек екенін айтты. "50 мың теңгеден беріп тұрасың" деді. Алғашында мұның не үшін екенін түсінбей аң-таң болдым. Бірақ ол біздің өзгелерге де көмектесуіміз керектігін айтты. Қайырымдылық көмек ретінде түсіндірді", - деді Жетес тілшімізге берген сұхбатында.

Істі тоқтату туралы қаулыға сүйенсек, федерация басшысы қаражат аударуға қатысы барын жоққа шығарған. Қаулыда оның сөзіне сүйене отырып, параспортшылар ақша аударған адамдарға оның ешқандай қатысы жоқтығы айтылған.

Дегенмен, Жетес пен Айжан бетпе-бет жүздесу кезінде ақшаны федерация басшысының әпкесі мен құрбысына аударғандарын білгенін жеткізді. Сонымен қатар, олар басшының нақты есепшоттарға ақша аударуды сұраған және өздерінің оған растау чектерін жіберген скриншоттарын ұсынды.

"Әділдік болуы керек! Қай жерде болмасын, біздің басымыздан өткен жағдайды бастан кешкен адамдар көп. Мұндай мәселелерде әділдік орнауы тиіс. Бұл тек маған ғана емес, басқалар үшін де қажет", - дейді Айжан.

Бұл оқиға туралы толығырақ SauBall арнасындағы параспортшылармен болған сұхбаттан көре аласыздар.