“Мүмкіндікті күтемін“ – аңызға айналған форвард Сәтпаевтың командасында ойнау туралы

Фото: depositphotos.com/instagram.com/burnleyofficial/

Ұлыбританиялық футбол аңызы Джейми Варди "Бернли" клубымен келісімшартқа отырғаннан кейін алғашқы мәлімдемесін жасады. Ол жаңа ұжымда қазақстандық Дастан Сәтпаевпен бірге өнер көрсетеді, - деп хабарлайды Tengri Sport клубтың баспасөз қызметіне сілтеме жасап.

"Лестер" сапында Англия чемпионы атанған 39 жастағы шабуылшы өткен демалыс күндері "Бернлиге" қосылды. Вардидің айтуынша, ол жаңа командадағы алғашқы матчін өткізуге асық.

"Бұл - бай тарихы бар және жанкүйерлері керемет клуб. Олар өздерінің де, бүкіл қаланың да намысын абыроймен қорғайтын командаға лайық. Алаңға шығып, "Бернлидің" алға жылжуына көмектесу мүмкіндігін тағатсыздана күтемін", - деді ол.

Еске салайық, осы маусымнан бастап "Бернли" сапында Қазақстан құрамасының вингері Дастан Сәтпаев та өнер көрсетіп жүр. Ол команда үшін 4 ойын өткізіп, соның бірінде алаңдағы үздік ойыншы деп танылды.

Джейми Варди деген кім?

Айта кетейік, ағылшын шабуылшысы - тарихы ерекше футболшы. Ол бала кезінде "Шеффилд Уэнсдей" академиясында жаттыққанымен, 25 жасқа дейін әуесқой клубтар мен бірінші лига командаларында ойнаған.

"Лестер" оны қарапайым "Флитвуд" клубынан сатып алып, үш жылдан кейін Англия чемпионатында сенсация жасап, жеңімпаз атанған команданың көшбасшысына айналдырды.

2021 жылы Варди тағы бір олжа - Англия кубогын иеленді. Сонымен қатар, ол команда АПЛ-дан түсіп қалғанда да тастап кетпей, 2023/2024 маусымында элитаға қайта оралуына көмектесті.

Вардидің еншісінде Англия құрамасы сапында өткізген 26 матч пен Еуро-2016 додасына қатысу тәжірибесі бар.

Instagram-дағы бұл жарияланымды көру

Burnley Football Club (@burnleyofficial) жарияланымы

Сәтпаев матчке қатыспады, "Бернли" жеңілді

Айта кететін жайт, Чемпионшиптің осы маусымында "Бернли" қатарынан бес матч бойы жеңіске жете алмады. Сонымен қатар, команда Лига кубогынан шығып қалды.

Қазақстандық Дастан Сәтпаев "Мидлсбромен" болған (1:1) ойында жарақат алып, "Бристоль Ситиге" қарсы келесі кездесуге қатыса алмады. Команда есепте алда тұрғанымен, қорытындысында 1:2 есебімен есе жіберді.

"Бернли" жаттықтырушысы Ники Хайеннің сөзінше, вингер бірнеше апта бойы алаңға шықпайды. Сондай-ақ, оның Қазақстан құрамасының 26 қыркүйекте өтетін алдағы матчіне дейін қатарға қосыла алар-алмасы белгісіз.