“Нәтиже беруге міндетті“: “Бернли“ бапкері Сәтпаев қатысқан матч туралы пікір білдірді

"Бернли" бапкері Ники Хайен маусымдағы алғашқы сырт алаңдағы матчте "Вест Бромвич Альбионнан" жеңілгеннен кейін өз командасының ойынына баға беріп, алаңда көрсетілген деңгейдің "жеткіліксіз" екенін мәлімдеді.

"Ең алдымен, бұл жеңіліс әбден лайықты болды. Меніңше, оларда бізге қарағанда энергия әлдеқайда көп болды, олар мұны жекпе-жектерде және доп үшін күресте көрсете білді. Біз тым баяу ойнадық.
Өткен аптадағы деңгейімізден өте алыс болдық, мұны киім ауыстыратын бөлмеде де айттық: егер біз шынымен де бар күшімізді салсақ, онда жоғары деңгейлі командамыз.

Бірақ бүгінгідей ойын көрсетсеңіз, онда сіз жай ғана ортанқол командасыз. Бізге өткен аптада жақсы орындаған дүниелерімізге қайта оралу керек, өйткені бүгін бұл жеткіліксіз болды", - деді бапкер.

Жаттықтырушы клуб әрқашан жоғары деңгейдегі ойын көрсетуге міндетті екенін атап өтті. Сондай-ақ Ники Хайен матчте команда допқа талас кезінде барынша қатал ойнауы тиіс сәттер болғанын айтты.

"Мұндай деңгейді әр апта сайын көрсету керек, тіпті өткен аптадағыдай матчтер апта ортасында болса да. Жақсы ойыншы мен топ-футболшының айырмашылығы да осында – сен қиын болса да, шаршасаң да әрдайым нәтиже беруге міндеттісің. Бәрі менталитетке байланысты.

Жекпе-жектер мен допты іліп әкетуге келсек – матчтің соңында бәрін өздеріңіз көрдіңіздер. Қарсылас допты трибунаға қарай теуіп жатты. Егер доптың жолында біреудің аяғы болса, олар оны да қоса теуіп жіберер еді. Ал біз қатал күресудің орнына аяғымызды тартып алдық. Бұл біз жетілдіруіміз керек тұс", - деп толықтырды бапкер.

Бұдан бөлек, маман екінші таймда команданың құрылымы бұзылғанын айтты. Жаттықтырушының пікірінше, қосалқы құрамдағы ойыншылар бапкерлер штабының шешіміне ренжімей, әрдайым командаға жаңа серпін беруі керек.

"Екінші таймда біз тактикалық құрылымды жоғалтып алдық. Ойыншыларымыздың дене тілі қалай өзгергенін байқаған боларсыздар – өткен аптада олардың іс-қимылында сенімділік болса, бүгін оларға қиынға соқты. Үйдегі және сырттағы матчтердің арасында айырмашылық болмауы керек, біз әрқашан бір қалыпта ойнағымыз келеді. Бұл ретте бізге жақсырақ әрекет ету қажет.

Әрине, бізде көңілі толмаған ойыншылар бар – қосалқы құрамда қалғандар. Бірақ егер олар алмасуға шықса, әсіресе біз жеңіліп жатқанда, ренжіп жүрмей, командаға жаңа энергия әкелуге міндетті. Жұмыс істейтін тұстарымыз бар, біз оның солай болатынын білдік. Бізге аздап уақыт керек, бірақ футболда ешкімнің уақыт бермейтінін жақсы түсінемін. Қадам-қадаммен алға жылжып келеміз, бірақ бүгінгі матч нашар болды", - деді маман.

Дастан Сәтпаев Чемпионшипте алғаш рет ойнады

18 жастағы қазақстандық алаңға екінші таймда, 57-минутта шықты. Шабуылшы жартылай қорғаушы Джош Лоренттің орнына шығып, ағылшын Чемпионшипіндегі алғашқы ресми матчін өткізуге мүмкіндік алды.

Дастан Сәтпаев 33 минут ойнап, 16 пастың 14-ін дәл берді, оның ішінде 4 пастың 3-і финалдық аймаққа жетті.

Ол 2 жекпе-жектің екеуінде де жеңіске жетіп, Flashscore-дан 6,1 балл алды.

"Вест Бромвич" - "Бернли": матч қалай өтті?

Сәтпаевтың командасы есепте алда тұрған болатын, бірақ қорытындысында 1:3 есебімен есе жіберді. 8-минутта "Вест Бромвичтің" жартылай қорғаушысы Каллум Стайлз өз қақпасына гол соғып алды. Ал 10 минуттан кейін оның командаласы Харри Уитвелл есепті теңестірді.

Екінші таймда, 46-минутта Айзек Прайс "Вест Бромвичті" алға шығарса, 65-минутта ол пенальтиді сәтті орындады.

Матчтің қорытынды есебі — 1:3, "Вест Бромвичтің" пайдасына.

Бұл жеңілістен кейін "Бернли" "Вест Хэммен" тең түскеннен (2:2) кейінгі бір ұпайымен турнирлік кестеде 18-орынға жайғасты.

"Бернлидің" келесі матчтері

"Бернли" келесі ойынын сәрсенбіде, 26 тамызда, Англия футбол лигасы кубогының 1/32 кезеңі аясында өткізеді. Қарсылас – үшінші лигадағы "Брэдфорд Сити".

Айдың қорытынды матчінде, 29 тамызда "Бернли" Чемпионшиптің 3-туры аясында "Норвичпен" кездеседі.