Назым Қызайбай жаңа марапатқа ие болды

Фото: instagram.com/boxingkazakhstan

Бокстан Қазақстанның үш дүркін әлем чемпионы Назым Қызайбай І дәрежелі Құрмет белгісімен марапатталды, деп хабарлайды Tengri Sport.

Спорт күніне орай Астанадағы Ұлттық Олимпиада комитетінде (ҰОК) спортшылар мен жаттықтырушыларды салтанатты марапаттау рәсімі өтті. Боксшы Назым Қызайбай Қазақстанның олимпиадалық қозғалысына сіңірген еңбегі үшін І дәрежелі Құрмет белгісін иеленді.

Боксшылар арасында бұл марапатқа Қазақстан ерлер құрамасының өкілдері, ағайынды Нұрбек пен Айбек Оралбайлар да ие болды. Сондай-ақ бокстан Қазақстан құрамасының аға жаттықтырушысы Асқар Еркебаев, әйелдер құрамасының жаттықтырушысы Елдос Сайдалин және Алматы әйелдер құрамасының аға жаттықтырушысы Долқұнжан Кәмеков марапатталды.

Instagram-дағы бұл жарияланымды көру

Kazakhstan Boxing Federation (@boxingkazakhstan) жариялаған жазба

Назым Қызайбай – еліміздің ең атақты боксшысы

Назым Қызайбай 48 келіге дейінгі салмақта Әлем чемпионатын үш рет жеңіп алды. Ол алғашқы титулын 2014 жылы Кореяның Чеджу қаласында иеленсе, екі жылдан кейін Астанада бұл жетістігін қайталады.

2025 жылдың наурызында Сербияның Ниш қаласында өткен турнирде ол үшінші рет әлем чемпионы атанды.

Париж Олимпиадасында қазақстандық боксшы Назым Қызайбай жартылай финалға дейін жетіп, онда Азия ойындарының чемпионы, қытайлық Ю У-ға есе жіберді.

Бұл нәтиже қазақстандық әлем чемпионына мансабында алғаш рет Олимпиада ойындарының медалін жеңіп алуға мүмкіндік берді.

Instagram-дағы бұл жарияланымды көру

Kazakhstan Olympic Team (@olympickz) жариялаған жазба

Ал Ливерпульде (Англия) өткен Әлем чемпионатында Назым Қызайбай өз мансабында төртінші рет әлемдік доданың финалына шықты, бірақ алғаш рет жеңіліп, күміс жүлдегер атанды.

Назым Қызайбай кейінгі рет Гуйяньда (Қытай) өткен World Boxing Әлем кубогінің кезеңі аясында шаршы алаңға шығып, Қазақстан қоржынына алтын медаль салды.