Нұрсұлтанов WBC титулы үшін айқаста Әлімханұлының тағдырын қайталамайды

Фото © Tengrinews.kz / Тұрар Қазанғапов; instagram.com/meiirim.nursultanov

Қазақстандық жеңілмеген боксшы Мейірім Нұрсұлтанов WBC уақытша чемпионы атағы үшін өтетін жекпе-жегі алдында жағымды жаңалық естіді, деп хабарлайды Tengri Sport.

Бұған дейін қазақстандық Мейірім Нұрсұлтановтың WBC уақытша чемпионы атағы үшін америкалық кіші Хесус Рамоспен жұдырықтасатыны, ал осы текетірестің жеңімпазы негізгі белбеу иегері Карлос Адамеспен кездесетіні белгілі болған еді.

Инсайдер Бен Джейкобстың әлеуметтік желіде хабарлауынша, WBC-дің тұрақты чемпионы Карлос Адамеске титулды қорғау алдында аралық жекпе-жектер өткізуге тыйым салынды.

Бұл дегеніміз, қазақстандық боксшы уақытша титул үшін шайқаста жеңіске жетсе, келесі кездесуінде бірден Адамеспен бетпе-бет келеді.

Еске сала кетейік, қазақстандық Мейірім Нұрсұлтанов пен америкалық кіші Хесус Рамос арасындағы WBC уақытша чемпионы атағы үшін жекпе-жек 19 қыркүйекте Сан-Диего (Калифорния штаты, АҚШ) қаласындағы Pechanga Arena-да өтеді.

Нұрсұлтановтың қарсыласы Әлімханұлынан "қашып кеткен" болатын

Еске сала кетейік, бұған дейін бокс ұйымдары Карлос Адамес пен қазақстандық әлем чемпионы Жәнібек Әлімханұлы арасында біріктіруші жекпе-жек ұйымдастыруға тырысқан болатын.

Команданың айтуынша, доминикандық боксшы қазақстандық үшін жақсы қарсылас болған.

2025 жылы шілдеде Әлімханұлы Карлос Адамеспен орта салмақтағы WBO, IBF (қазақстандықтың белбеулері) және WBC (доминикандықтың белбеуі) нұсқалары бойынша әлем чемпионы атағы үшін жекпе-жекке келісімшартқа отырғанын мәлімдеді.

Алайда Әлімханұлының айтуынша, Адамес жекпе-жектен қашқақтап, келісімшартқа қол қоймаған. Қазақстандық қарсыласын қорқақтығы үшін айыптады. Осыдан кейін боксшылар әлеуметтік желіде сөз таласып қалды.

Нұрсұлтанов 3 жылға жуық уақыт бойы жұдырықтаспаған

Қазақстандық үшін бұл үш жылдық үзілістен кейінгі шаршы алаңға оралуы болмақ - ол соңғы рет 2023 жылдың қарашасында жекпе-жек өткізген. Ол кезде төрешілердің бірауыздан шығарған шешімімен чилилік Хулио Аламосты жеңген болатын.

Жекпе-жек негізінен алыс және орта қашықтықтағы тактикалық айқаспен өтті. Екі боксшы да көбіне сырттай жұмыс істеді. Аламос андердог мәртебесіне қарамастан лайықты өнер көрсетіп, 9-раундта тіпті фавориттің бетін аздап қайтарды.

Алайда жекпе-жектің екінші жартысында ол екі раундтан артық жеңе алмады. Нұрсұлтанов жоғары қарқын мен дәлдіктің арқасында кездесуді бақылауда ұстады.

Жекпе-жек толық дистанцияға созылды. Нұрсұлтанов төрешілердің бірізді шешімімен жеңіске жетті. Бұл оның қатарынан 20-шы жеңісі болды.

Нұрсұлтанов Әлімханұлынан "қашқан" чемпионмен жұдырықтасуы мүмкін