Олимпиада жүлдегері Қазақстанға Азия ойындарының жаңа медалін сыйлады

Фото: ҰОК/ Нұрғали Жұмағазы

Қазақстандық мерген Ислам Сатпаев Жапонияның Аичи және Нагоя қалаларында өтіп жатқан Азия ойындарында қола медаль иеленді, - деп хабарлайды Tengri Sport.

Париж Олимпиадасының қола жүлдегері 50 метрден пневматикалық мылтықпен үш позицияда нысана көздеуден үшінші орын алды. Сатпаев тек Қытайдың екі өкіліне ғана жол берді.

Айта кетейік, бұл - қазақстандық мергендердің биылғы Азиададағы үшінші жүлдесі. Бұған дейін стенд атудан әйелдер құрамасы екінші орын иеленсе, Әсем Орынбай жекелей сында қола медаль жеңіп алған болатын.

Ал Ислам Сатпаевқа келер болсақ, ол Александра Лимен бірге Париж Ойындарында 10 метрден пневматикалық мылтықпен атудан аралас командалық жарыста қола жүлдегер атанған еді.

Фото: ҰОК/Нұрғали Жұмағазы

Қазақстан құрамасының Азиадада қанша медалі бар?

Сатпаевтың қоласынан кейін Қазақстан қоржынында 27 медаль болды. Команда Азия ойындарының жалпы есебінде 8 алтын, 8 күміс және 11 қола жүлдемен төртінші орында келеді.

Сатпаевтан бөлек, бүгін құрама қоржынына тағы бір медальді есуші қыздар салды. Ольга Шмелева, Стэлла Суханова, Татьяна Токарницкая және Эвелина Костенкодан құралған Қазақстан экипажы 500 метрге байдаркамен есуден үшінші орынға табан тіреді.

Сондай-ақ, семсерлесуден әйелдер құрамасы кем дегенде қола жүлдені иеленетінін нақтылады. Олар жартылай финалға жолдама алып, алтын үшін күресті жалғастырады.