Сенсация! Қазақстан құрамасы алғаш рет семсерлесуден Әлем чемпионатын жеңіп алды

Гонконгте (Қытай) өткен турнир финалында қазақстандықтар Украина құрамасымен кездесті. Финалдағы басты ерекшеліктердің бірі - біздің құраманың бас жаттықтырушысы, украиналық маман Александр Горбачук болды.

Қазақстан құрамасының финалдағы құрамы: Вадим Шарлаимов, Ерлік Сертай, Кирилл Проходов және Руслан Құрбанов.

ӘЧ финалындағы Қазақстан - Украина кездесуі: матч барысы

Алғашқы айқастарда қарсыластар бір-бірін аңдып, тіпті енжарлық танытқаны үшін айып ұпайларын алды. Алайда, қашықтықтың үштен бірі өткен соң Қазақстан құрамасы +2 ұпаймен шағын басымдыққа ие болды.

Бәсекенің орта тұсында Вадим Шарлаимов аяғынан жеңіл жарақат алып, медициналық үзіліс алды. Жаттықтырушы спортшыны алмастырмады, ал Вадим үзілістен кейін +4 ұпаймен керемет серпін жасады.

Украиналықтар финалдық айқастарға жақындағанда есеп айырмасын екі ұпайға дейін қысқарта алды.

Жарақатына байланысты соңғы жекпе-жегіне Вадим Шарлаимов шыға алмады, оның орнын Әлем чемпионаттарының жекелей сындағы жүлдесіне ие болған жалғыз спортшы Руслан Құрбанов басты.

Шешуші айқас алдында Қазақстан бес ұпай басымдығына ие болды, ал тұғырға 19 жастағы Кирилл Проходов шықты. Ол психологиялық қысымға төтеп беріп, матчті жеңіске дейін жеткізді.

Қорытынды: 45:40 есебімен Қазақстан жеңіске жетті.

Қола жүлдені тартысты бәсекеде Мысыр құрамасы иеленді, оларды қазақстандықтар жартылай финалда жеңген болатын.

Қазақстан құрамасы ӘЧ-2026-да: алтынға жеткізген жол

Гонконгте өтіп жатқан Әлем чемпионатында Қазақстан құрамасы Финляндия, Өзбекстан, Дания және Мысырдан келген қарсыластарын жеңді.

Ең тартысты жекпе-жек өзбекстандықтармен болды, онда біздің команда есепте артта қалып тұрып, соңында бір ұпай айырмашылығымен жеңісті жұлып алды.

Еске сала кетейік, бұған дейін ұлттық құраманың семсерлесуден Әлем чемпионаттарындағы ең үздік нәтижесі былтыр Грузияда иеленген қола медаль болатын.

Тарихи жеңістен кейін команда көшбасшысы Руслан Құрбанов Tengri Sport-қа берген сұхбатында Қазақстандағы спорттың бұл түрінің дамуы туралы айтып берді.

Айта кетейік, Париж Олимпиадасында Қазақстан құрамасы 1/4 финалда Мажарстанға есе жіберген болатын. Келесі Ойындар бағдарламасына да семсерлесу енгізілген.

Тарихта алғаш рет: Қазақстан Өзбекстанға қарсы камбэктен кейін ӘЧ финалына шықты