“Оны құрамаға алыңыздар“: қазақстандық оператор желі жұлдызына айналды

Бейнеден алынған кадрлар

Жеңіл атлетикадан Қазақстан чемпионаты кезінде әлеуметтік желіде оператордың спортшылармен бірдей жылдамдықта жүгіріп бара жатқан видеосы тарады. Қазақстандықтар оны ұлттық құрамаға алуды ұсынып жатыр, деп хабарлайды Tengri Sport.

Ерекше роликті бапкер Әсия Рабаева жариялады - онда оператор 100 метрге жүгіру қашықтығын түсіріп, спортшылармен шамалас жылдамдықта жүгіріп келе жатқанын көруге болады.

Бір тәулікке жетпейтін уақыт ішінде видео 500 мың қаралым мен жүздеген таңданысқа толы пікір жинады.

"Операторлардың спортшылардан да жылдам жүгіретініне әрқашан таңғаламын, бұл қалай болғаны...";

"Оператор мықты, кез келген жағдайда жарап тұр";

"Егер камерасы болмағанда, анық бірінші орын алар еді";

"Операторды ҚР құрамасына алыңыздар! Ол бүгін танымалдылық жағынан барлық рекордты жаңартып жатыр", - деп жазады әлеуметтік желі қолданушылары.

"Бұл көбінің қолынан келе бермейді" - оператор танымал болған ролик туралы айтып берді

Кенет танымал болған оператордың есімі Ыбырай Төлемісов. Ол спорттық арнада немесе жеңіл атлетика федерациясында емес, Шымкент спорт басқармасында жұмыс істейді.

Оның әлеуметтік желідегі парақшасында жарыс кезінде спортшылармен бірге қалай жүгіріп үлгеретіні туралы осыған ұқсас видеолар бұрын да шыққан. Бірақ дәл осы видео сәтті шығып, оны жұлдызға айналдырды.

"Бұл жай ғана көп қаралым жинаған видео, әйтпесе мен мұндай кадрларды күн сайын түсіремін", - деді ол тілшімізбен әңгімелесу барысында.

Оператордың осындай жүгіріс жасауға мүмкіндік беретін жақсы физикалық дайындығы оның өзі де спортпен шұғылданатынымен түсіндіріледі.

"Мен күн сайын жаттығамын, жүгіремін, велосипед тебемін, демалыс күндерімді тауда өткіземін. Жеңіл атлетпін, скайраннермін, велоспорт, атқа міну, жүзу, тау шаңғысымен айналысамын - жалпы динамика мен экстримге қатыстының бәрі бар", - деп бөлісті ол.

- Жарыстарды түсіріп жүргеніңізге қанша уақыт болды және спорт операторы жұмысының ерекшелігі неде?

"Бұрын кино мен клип түсіретінмін, бірақ кейін ол іс жалықтыра бастады, содан соң спортты түсіруге көштім. Өзім спортшы болғандықтан, осы түсіру дағдыларымды спортта қолдану үшін 2,5 жыл бұрын мені Шымкент спорт басқармасына шақырды. Спортшыларды түсіру көп оператордың қолынан келе бермейді", - деп есептейді Ыбырай.

Оның айтуынша, жарыс кезінде ол әр санат бойынша бір реттен жүгіреді, кейде фальстартқа байланысты қашықтықты қайта жүгіріп өтуіне тура келеді.