Балалардың жағдайы туралы не белгілі?
Ташкенттегі №5 қалалық клиникалық жұқпалы аурулар ауруханасында 17 қазақстандық жатыр. Олардың арасында 11 бала және алты ересек адам бар.
Елшіліктің мәліметінше, зардап шеккендердің барлығының жағдайы тұрақты. Пациенттерге қажетті медициналық көмек көрсетіліп жатыр.
"Қазақстан елшісі ауруханаға барып, емдеу барысымен танысты және зардап шеккендердің ата-аналарымен кездесті. Медициналық көмек көрсету мәселесі оның жеке бақылауында", - делінген хабарламада.
Жағдайды Қазақстанның денсаулық сақтау министрі Ақмарал Әлназарова мен Өзбекстан денсаулық сақтау министрінің бірінші орынбасары Отабек Имамов бақылауға алды.
Көмек көрсетуге Ташкент медициналық университетінің профессорлары, санитарлық-эпидемиологиялық қызмет мамандары және басқа да бейінді сарапшылар тартылды.
Еске сала кетейік, 1 қарашада Ташкенттегі Dostlik Cup 2026 футбол турниріне қатысушылардың денсаулығы жаппай сыр бергені белгілі болды. Турнирге Қазақстан, Қырғызстан және Өзбекстаннан келген командалар қатысқан. Қарағанды облысының намысын үш жекеменшік футбол мектебінің тәрбиеленушілері қорғады.
Қарағандылық балалар футбол командасы қатысушыларының ата-аналары балалар 31 қазанда қонақүйдегі таңғы астан кейін өздерін жайсыз сезінгенін айтты. Жас футболшылардың іші ауырып, дене қызуы көтерілген. Кейбіріне жүйелі тамшылатқыш (капельница) қажет болған. Ата-аналар бұған тамақтан улану себеп болуы мүмкін деп болжайды.