“Өзіме уәде бердім“: қазақстандық чемпион мансабын неге аяқтағанын түсіндірді

Фото © Tengrinews.kz / Маржан Қуандықова

Шорт-тректен әлем кубогы кезеңінде топ жарған алғашқы қазақстандық әрі Азия ойындарының чемпионы Абзал Әжіғалиев спорт мансабын неге аяқтауға шешім қабылдағанын айтты, - деп хабарлайды Tengri Sport.

Төрт Олимпиадаға қатысып, Қазақстан құрамасының туын екі рет көтерген шорт-трек шебері күні кеше спортшы ретіндегі мансабын аяқтап, енді бапкерлікке бет бұратынын мәлімдеді.

Tengri Sport тілшісіне берген сұхбатында Абзал бұл шешімге не себеп болғанын түсіндірді.

– Бұл шешім неге маусым аяғында емес, дәл қазір қабылданды?

– Мансабымды аяқтауды кейінгі екі жылдан бері ойлап жүрдім. Олимпиада алдында өзіме: "Тағы бір рет Олимпиадаға жолдама алып, бағымды сынап көремін, содан кейін ғана мансабымды аяқтағанымды жариялаймын" деп уәде берген едім, – деді ол.

– Бапкерлікке ұсыныстар түсті ме?

– Қазірше Қазақстан құрамасына көмектесемін. Онда өз бапкерлер құрамы бар, соларға қосылып, тәжірибемді бөлісемін, – деп атап өтті Абзал.

"Ең бақытты сәт? Соңғы Олимпиада" – Әжіғалиев өз мансабы туралы

34 жастағы Әжіғалиев ұлттық құрама сапында ұзақ жолдан өтті. 2026 жылы Италияда өткен Олимпиадада ол команданың ең тәжірибелі спортшыларының бірі болды.

Олимпиадаға аттанар алдында біздің тілшіге берген сұхбатында Абзал жауапкершілік бұрынғыдан да жоғары екенін айтқан еді.

"Төртінші Олимпиада ойындарында жауапкершілік сезіледі. Бардым, өнер көрсеттім деуге болмайды. Осы жиған тәжірибем жақсы нәтиже көрсетуге көмектеседі деп үміттенемін. Біз жай өнер көрсету үшін емес, ел намысын қорғау үшін, күресу үшін барамыз", – деген болатын ол.

Алайда Абзалға Олимпиада жүлдесін еншілеу бұйырмады. Қазақстан ерлер құрамасы өздері мықты саналатын эстафеталық сайысқа жолдама ала алмады. Ал 500 метрлік жекелей жарыста Әжіғалиев ширек финалда тоқтады.

Оның үстіне Абзалдың төртінші Олимпиадаға қатысуы да екіталай еді. 2022 жылғы Олимпиададан кейін спортшы екі жыл бойы құрама сапына өте алмады.

"Олимпиада циклі 4 жылға созылады және бұл деңгейді үнемі ұстап тұру өте қиын. Олимпиадада жақсы өнер көрсету үшін жарысқа "құштар" болуым керек деп шештім. Жаттығуды тоқтатпадым, бірақ жарыстарға қатыспадым, бұл маған көмектесті. Нәтижесінде лицензия жеңіп алып, Олимпиадаға бір жыл қалғанда қызу дайындыққа кірістім", – деді ол.

Жүлде бұйырмағанына қарамастан, Әжіғалиев 2026 жылғы Олимпиаданы мансабындағы ең бақытты кезең деп санайды.

"Мансабымдағы ең бақытты әрі ең әсерлі сәт – соңғы Олимпиада. Ұзақ уақыт жарысқа қатыспасам да, қайта оралып, Олимпиадаға жолдама ала алдым. Бұл менің спорт жолымдағы ең ауыр кезең болды. 34 жаста да жас спортшылармен тең дәрежеде бәсекеге түсіп, оларды жеңе алатынымды өзіме дәлелдедім", – деп түйіндеді спортшы.

Еске салайық, Абзал Әжіғалиев – Азия ойындарының алтын, күміс және қола жүлдегері. Сондай-ақ, 2022 жылғы Бейжің Олимпиадасының финалында төртінші орын алған және Қазақстан құрамасының туын екі рет ұстап шыққан спортшы.