“Рекорд“ - қазақстандық Гонконгтегі Азия чемпионатында алтын жеңіп алды

Қазақстандық жеңіл атлет Максим Сажнев Гонконгте өтіп жатқан 20 жасқа дейінгі спортшылар арасындағы Азия чемпионатында диск лақтырудан алтын медаль иеленді, деп хабарлайды Tengri Sport.

Финалда 17 жастағы спортшы дискіні 60,45 метрге лақтырып, қарсыластарынан айқын басым түсті. Бұл нәтиже оның жеке рекорды ғана емес, 20 жасқа дейінгі спортшылар арасындағы Қазақстанның жаңа рекорды болды.

Жарыс барысында Максим көрсеткішін біртіндеп жақсартып отырды. Ол үш мүмкіндігінде нәтижесін 45,67 метрден 60,45 метрге дейін жеткізді.

Жүлдегерлер тізімі:

• Максим Сажнев, Қазақстан – 60,45 метр
• Нишчай Нишчай, Үндістан – 60,10 метр
• Хамад Дхави Альсултан, Катар – 59,47 метр

Айта кетейік, бұған дейінгі Қазақстан рекорды 57,97 метр болған. Оны да 2026 жылдың сәуірінде Максим Сажневтің өзі орнатқан еді.

Мамандардың айтуынша, бұл нәтиже жаңартылған рейтингте қазақстандық спортшының әлемдегі ең үздік он жасөспірімнің қатарына кіруіне мүмкіндік беруі мүмкін.

Азия чемпионаты Гонконгте 28-31 мамыр аралығында өтеді.

Қазақстанда алғаш рет жеңіл атлетикадан әлем чемпионаты өтеді: толығырақ