“Рыбакина бірінші болады“: Соболенко қазақстандық теннисшімен бәсеке туралы айтты

Беларусьтік теннисші ширек финалда Линда Носкованы чемпиондық тай-брейкте ұтып, Американың Үлкен дулыға турнирінде қатарынан алтыншы рет жартылай финалға шықты.

Бұл ретте Аринаның турнирдегі нәтижесіне қарамастан, егер қазақстандық Елена Рыбакина да жартылай финалға дейін жетсе, Соболенко әлемнің бірінші ракеткасы атағынан айырылуы мүмкін.

- Рейтингтегі жағдай саған байланысты емес екенін және қазірше өзіңнен талап етілетін нәрсенің бәрін жасап жатқаныңды түсінеміз. Егер Елена (Рыбакина) бірінші болып, ал сен үшінші US Open титулыңды жеңіп алсаң, бұған қалай қарайсың? - деп сұрады Соболенкодан жеңістен кейінгі баспасөз мәслихатында.

- Иә, мен өте бақытты болар едім. Мәселе жоқ. Мен қарсы емеспін, - деп жауап берді Арина.

- Бұл сен үшін маңыздырақ болар ма еді?

- Әрине, иә. Жетістікті қайталау - керемет нәрсе, - деп атап өтті Соболенко.

Еске сала кетейік, 100 аптадан астам уақыт бойы көш бастап тұрған Соболенконы бірінші орыннан ығыстыру үшін Елена Рыбакинаға US Open ширек финалында қытайлық Циньвэнь Чжэнді жеңу жеткілікті.

Соболенко бұған дейін Рыбакина туралы не деді?

Аринаның қазақстандық теннисшіге қатысты әрдайым құрметпен қарай бермейтінін еске сала кетейік. Рыбакинадан алғаш рет жеңілгеннен кейін (Индиан-Уэллс 2023 финалы) беларусьтік теннисші марапаттау рәсімі кезінде Еленаға тілін шығарған болатын.

WTA 2025 Қорытынды турнирінің финалы кезінде Соболенконың жүйкесі сыр берді. Рыбакина кезекті сәтті ұпайын алғаннан кейін, Арина өз командасына "жылына бір рет таяқ та атады" деп айтқан.

Tengri Sport-қа берген сұхбатында қазақстандық теннисші бұл сөз оған бағытталса да, қарсыласына ешқандай реніші жоқ екенін айтты.

"Маған матчтен кейін жіберген болатын, бірақ ол контексте айтылған сөз еді. Біз Аринамен көп рет ойнадық, биыл да бір емес, бірнеше рет кездестік, сондықтан мен бұған аса көңіл бөлмеймін. Мен Аринаға да, оның командасына да жақсы қараймын, сондықтан бұл шынымен маған қарата айтылса да, көңіліме алмаймын", - деді Рыбакина.

Айта кетейік, Соболенко сабырлы қалыпта берген сұхбаттарында Рыбакинаны "ғажайып теннисші" деп атап, оның допты ойынға қосу шеберлігін жоғары бағалап, талай рет құрмет білдірген.

Рыбакина қашан әлемнің бірінші ракеткасы атануы мүмкін?

Рыбакина - Чжэн матчі 9 қыркүйекке жоспарланған, осы ойыннан кейін Рыбакина WTA live-рейтингінде Соболенкодан озып кетуі мүмкін. Матчтің басталуы Қазақстан уақытымен 20:30-ға белгіленген, бірақ US Open корттарындағы басқа кездесулерге байланысты өзгеруі мүмкін.

Бұл ретте WTA рейтингі ресми түрде тек US Open аяқталғаннан кейін өзгереді. Турнир 13 қыркүйекке дейін жалғасады.