Рыбакина ма, Соболенко ма? WTA әлемдік рейтингке қатысты мәлімдеме жасады

Фото: © Tengrinews.kz / Тұрар Қазанғапов//depositphotos.com/ogfoto@yahoo.es

Әйелдер теннисі қауымдастығы (WTA) әлемнің бірінші ракеткасы атағына талас қалай өрбитінін жариялады. Қазақстандық Елена Рыбакина келесі аптада-ақ рейтингте көш бастауы мүмкін, деп хабарлайды Tengri Sport WTA баспасөз қызметіне сілтеме жасап.

Әлемдік рейтингтің көшбасшысы, беларусьтік Арина Соболенко US Open турнирінде жеңіске жетсе де, өз орнын сақтап қала алмауы мүмкін. Оның алдын Елена Рыбакина орап кетуі ықтимал.

"Рыбакина Нью-Йоркке ең айқын мүмкіндікпен келеді. Ол тіпті бірде-бір матчте жеңіске жетпесе де, әлемнің бірінші ракеткасы атануы мүмкін. Ал егер жартылай финалға дейін жетсе, оның рейтингте бірінші орынға шығуына ешкім кедергі келтіре алмайды", - деп хабарлайды WTA.

Қазақстандық теннисшінің әлемдік теннистің шыңына алғаш рет көтерілуіне тек үш спортшы кедергі келтіруі мүмкін. Соболенкодан бөлек, бірінші ракетка атағы үшін күреске америкалық Коко Гауфф пен Джессика Пегула қосылды.

"Рейтингтің жоғарғы сатысында тұрған екі америкалықтың қателесуге құқығы аз, бірақ екеуі де әлі жеңістен үмітті. Коко Гауфф АҚШ ашық чемпионатына Цинциннатидегі маусымдағы алғашқы жеңісінен кейін келе жатыр.

Джессика Пегула сәтті жазғы маусымын жалғастырып келеді, ол Вашингтон мен Цинциннатиде екінші орын иеленді. Гауфф пен Пегула үшін есеп бірдей: US Open турнирінде жеңіске жету және Рыбакина жартылай финалға жетпей ұтылады деп үміттену. Олардың кез келгені алғаш рет әлемнің бірінші ракеткасы атануы мүмкін", - деп атап өтті баспасөз қызметі.

Еске сала кетейік, осы маусымдағы Үлкен дулыға сериясының соңғы турнирі Нью-Йоркте (АҚШ) 31 тамыз бен 12 қыркүйек аралығында өтеді.

Рыбакина мансабындағы ең биік белеске бір қадам қалды

27 жастағы қазақстандық теннисші Елена Рыбакина мансабында Үлкен дулыға турнирлерінің екі титулын жеңіп алған (Уимблдон - 2022 және Australian Open - 2026). Теннисшінің қоржынында барлығы 13 WTA титулы бар, оның ішінде Қорытынды турнирдегі жеңісі де бар.

2026 жылдың наурызында ол алғаш рет әлемнің екінші ракеткасы атанса, енді рейтингте көш бастауға мүмкіндігі бар.

Instagram-дағы бұл жарияланымды көру

Elena Rybakina 🐠 (@lenarybakina) жариялаған жазба

Сонымен қатар Рыбакина осы жаздың басында-ақ Соболенконы басып озуы мүмкін еді, бірақ әзірге тарихи жетістікке бір табан жетпей тұр.

Соболенкоға келетін болсақ, ол 99 апта бойы WTA рейтингінде көш бастап келеді және US Open турнирінде қатарынан үшінші рет жеңіске жетсе, рекордтық көрсеткішке қол жеткізуі мүмкін.