Сабина Алтынбекова ауылдағы балалық шағы туралы айтып берді

Фото: instagram.com/altynbekova_20

Белгілі қазақстандық волейболшы Сабина Алтынбекова ауылдағы балалық шағы мен отбасындағы қарым-қатынасы туралы айтып берді, деп хабарлайды Tengri Sport.

Сабина Алтынбекова әлеуметтік желідегі парақшасында балалық шағы туралы ой бөлісті. Волейболшы өзінің үлкен әрі тату отбасы барын айтты. Алтынбекованың сөзінше, ата-анасы оның бойына руына деген сүйіспеншілік пен құрметті сіңірген, сондай-ақ олардың өздері де туыстық байланыстарды қастерлеп, ата-бабаларын құрметтеген. Қазақстандық спортшы бақытты балалық шағы үшін ата-анасына алғыс білдірді.

"Бала кезімнен ата-анам руыма, туған жеріме деген терең сүйіспеншілік пен құрметті бойыма сіңірді. Ауылда өткен бақытты балалық шағым үшін ризамын, шатыр астындағы отырыстарды, арбамен серуендеуді, жорықтарды ешқашан ұмытпаймын. Біздің отбасымыз үлкен әрі тату, өкінішке қарай, кейбірі бұл дүниеден өтіп кетті, бірақ бәрібір мәңгілік әлемде бірге боламыз, қымбаттыларым.

Менің өмірімдегі ең маңызды құндылық - отбасы. Ата-анамның туыстық қарым-қатынасты қалай қастерлегенін, ата-бабаларын қалай құрметтегенін көріп өстім, соның бәрін - үлкен махаббатты, шексіз құрмет пен ауызбіршілікті өз өміріме де серік еттім. Жанашырлық таныту, өз тегін білу, туған жерін мақтан тұту - ата-ананың басты міндеттерінің бірі болса керек.

Әке, ана, шынайы әрі бақытты балалық шағым үшін рақмет. Барлық туыстарыма алғыс айтамын, сіздерді қатты жақсы көремін және қадірлеймін", - деп жазды Алтынбекова әлеуметтік желіде.

Скриншот: instagram.com/altynbekova_20

Сабина Алтынбекова - қазақстандық волейбол жұлдызы

Еске сала кетейік, Сабина Алтынбекова 17 жасынан бастап Қазақстанның түрлі жастағы құрамаларына шақырылып келеді, ал 2014 жылы волейболдан жасөспірімдер арасындағы Азия чемпионатында нағыз жұлдызға айналып, турнирдің ең сұлу спортшысы деп танылған болатын.

Instagram-дағы бұл жарияланымды көру

Sabina Altynbekova | S20 (@altynbekova_20) жарияланымы

Танымалдылыққа ие болғаннан кейін Алтынбекова шетелдік командаларда өнер көрсетті: жапониялық GSS Sunbeams, БАӘ-нің "әл-Васл" және Индонезияның Yogya Falcons клубтарында ойнады.

Instagram-дағы бұл жарияланымды көру

Sabina Altynbekova | S20 (@altynbekova_20) жарияланымы

Ол соңғы маусымын елордалық "Астана" сапында өткізді, алайда 2026 жылдың ақпанында волейболшы тұрақты маусым аяқталуға бір ай қалғанда қазақстандық командамен келісімшартты екіжақты келісім бойынша бұзды.