Сәтпаевтың жұлдызды командаласы жанжалдан кейін татуировкасын өшіреді

Фото: instagram.com/burnleyofficial

Ағылшындық "Бернли" клубының жұлдызды футболшысы Кайл Уокер өзінің бұрынғы клубы "Манчестер Ситиге" қатысты татуировкасын өшіруге дайын екенін мәлімдеді, деп хабарлайды Tengri Sport.

"Манчестер Ситидің" бұрынғы капитаны, қазіргі уақытта ағылшындық "Бернлиде" өнер көрсететін Кайл Уокер егер жанжалға байланысты "қалалықтарды" Премьер-лига чемпиондығынан айырса, "қатарынан төрт рет" деген жазуы бар татуировкасын өшіруге дайын екенін айтты.

"Маған бұған баруға тура келетін шығар. Мен оны қалдыруға тырысамын, бірақ бізден ештеңені тартып алмайды деп үміттенемін. Ойыншы ретінде айтарым, біз тек алаңға шығып, үздік командалық футбол көрсеттік, сондықтан мен ойыншыларды өмірімнің соңына дейін қорғайтын боламын", - деп жауап берді Кайл Уокер.

"Манчестер Сити" жанжалы

2026 жылдың қыркүйек айының соңында тәуелсіз комиссия "Манчестер Ситиді" 2009/10 маусымынан 2017/18 маусымына дейінгі кезеңде Премьер-лиганың қаржылық ережелерін бұзды деген 115 айыптың 114-і бойынша кінәлі деп таныды.

Комиссияның нұсқасы бойынша, клуб иелерінен (Abu Dhabi United Group) келген 830 миллион фунт стерлингтен (496 миллиард теңге) асатын тікелей қаржыландыруды жасыру үшін ойдан шығарылған демеушілік келісімшарттарды пайдаланған.

Бұл қаражат коммерциялық табыс ретінде есепке алынып, клубқа қаржылық регламенттерді ресми түрде сақтауға мүмкіндік берген. Асыра көрсетілген кірістер мен төмендетілген шығыстардың жалпы көлемі 900 миллион фунттан (538,5 миллиард теңге) асады деп бағаланған.

🚨 "Манчестер Сити" 115 қаржылық айып бойынша кінәлі деп танылғаннан кейін, Чемпионшипке төмендеуіне кепіл болатын орасан зор ұпай шегерілуіне тап болуы мүмкін. Жазаның ауырлығы сондай, "Сити" екі маусым бойы Премьер-лигаға қайта оралу үшін күресуге мәжбүр болуы мүмкін. (Дереккөз: @MailSport)
— Transfer News Live (@DeadlineDayLive) October 20, 2026

Клуб заң бұзушылықтарды үзілді-кесілді жоққа шығарып, өздерінің кінәсіз екендігіне "бұлтартпас дәлелдер" бар екенін мәлімдеп, апелляция берді. Санкциялар әлі жарияланған жоқ: ірі көлемдегі айыппұл, ұпайларды шегеру, дивизионды төмендету және титулдардан айыру мәселелері талқыланып жатыр.

🚨 ШҰҒЫЛ ЖАҢАЛЫҚ: Премьер-лига тәуелсіз комиссияның "Манчестер Ситиді" тоғыз маусым бойы Премьер-лиганың қаржылық ережелерін өрескел бұзғаны үшін БАРЛЫҚ АЙЫПТАР БОЙЫНША КІНӘЛІ деп тапқанын және лиганың тергеуіне көмектесуден бас тартуына қатысты айыптардың басым бөлігін растағанын хабарлады. Клубтың тәуелсіз комиссияның шешіміне апелляция беруге құқығы бар және бұл құқықты 2 қазан, жұмаға дейін пайдалана алады. Премьер-лига кеңесінің мақсаты — толық процесті (соның ішінде кез келген апелляцияларды және тиісті шешімдерді жариялауды) мүмкіндігінше тезірек аяқтау. Тәуелсіз комиссия 2009/10 және 2017/18 маусымдары аралығында мынадай жайттарды анықтады: - "Манчестер Сити" клубтың кірістерін жасанды түрде арттыру және шығындарын азайту үшін бірқатар коммерциялық серіктестерімен "жалған" келісімшарттар жасасқан (олар тараптар арасындағы нақты келісімді бұрмалаған), сондай-ақ басқалармен де "жалған" келісімдерге сүйенген; - Клуб жалған есеп беріп, өз қаржысының шынайы жағдайын аудиторлар мен футбол реттеушілерінен жасырған; - "Манчестер Сити" Премьер-лиганың да, УЕФА-ның да шығындар шегін айтарлықтай бұзған; - Премьер-лиганың тергеуі барысында "Манчестер Сити" Лига алдындағы ынтымақтастық және адалдық міндеттерін бірнеше рет бұзған (айыпталған төрт бұзушылықтың үшеуі расталды).
— Fabrizio Romano (@FabrizioRomano) 29 қыркүйек, 2026 жыл

Уокердің "Манчестер Ситидегі" мансабы

Кайл Уокер "Манчестер Ситиге" 2017 жылдың жазында "Тоттенхэмнен" ауысып келіп, клубта сегіз маусым өткізді. Осы уақыт ішінде ол Гвардиола командасының негізгі ойыншыларының біріне айналды, бірнеше рет капитандық белгімен алаңға шықты және алты рет Премьер-лига чемпионы атанды, сондай-ақ Англия кубогін, Лига кубоктарын, Суперкубоктарды және Чемпиондар лигасын жеңіп алды.

Instagram-дағы бұл жарияланымды көру

Kyle Walker (@kylewalker2) жарияланымы

Кайл Уокердің аяғында Премьер-лигада қатарынан төрт рет жеңіске жеткен (2020/21–2023/24 маусымдары) тарихи серияның құрметіне салынған татуировкасы бар.

Кайл Уокер егер "Манчестер Сити" Премьер-лига титулдарынан айырылса, "қатарынан төрт рет" татуировкасын өшіретінін мойындады https://t.co/pMdNGcCxq0
— Daily Mail Sport (@MailSport) October 21, 2026

Уокер - Сәтпаевтың командаласы

Қазіргі таңда Уокер Чемпионшиптегі "Бернлиде" өнер көрсетеді және қазақстандық форвард Дастан Сәтпаевтың командаласы. Қазақстан құрамасының 18 жастағы шабуылшысы 2026 жылдың жазында "Челсиге" ауысып, кейін бірден "Бернлиге" жалға берілген болатын.