“Шавкат оралмайды“: Рахмоновтың командасы оның жағдайы туралы айтты

Белгілі америкалық файтер Шон Брэди Даниэль Кормьеге берген сұхбатында қазақстандық Шавкат Рахмоновқа қатысты өз ойын білдірді.

Оның айтуынша, "Номадтың" тізесіндегі мәселелер толастамағандықтан, ол жекпе-жекке қайта орала алмайды.

"Шавкат енді қайтып ешқашан төбелеспейді деп ойлаймын. Меніңше, ол мансабын аяқтады, өйткені ол қайта оралуға тырысқан сайын тізесі сыр бере береді. Ол толыққанды жаттығу лагерінен өте алмайды. Адамдар түсінбейді: лагерь - жекпе-жекке дайындықтың ең қиын кезеңі", - деді Брэди.

Рахмоновтың оралуы күмән тудырды

Шон Брэдиден бөлек, батыстық БАҚ та Рахмоновтың октагонға оралуына қатысты пікір білдірді. Heavy.com порталының жазуынша, қазақстандықтың чемпион болуға барлық қауқары жетеді, алайда жарақаттары оның әлеуетін толық ашуға кедергі болуы мүмкін.

БАҚ мәліметінше, Рахмонов жоқ кезде жартылай орта дивизионның басқа файтері өз позицияларын нығайтып, иерархияда одан озып кеткен.

UFC Daily News порталының пайымдауынша, бір тізенің қайта-қайта жарақаттануы ММА-дың жоғары деңгейіне қайта оралуды айтарлықтай қиындатуы мүмкін, әсіресе дайындығы қарқынды жаттығу лагерлерін қажет ететін файтер үшін.

Дегенмен, әзірге Рахмоновтың мансабы аяқталуға жақын деп кесіп айтуға негіз жоқ. Егер ол толық айығып, жаттығу лагері кезінде денсаулығында ақау болмаса, жартылай орта салмақтағы титулға басты үміткерлер қатарына қайта қосыла алады.

Шавкат Рахмоновтың командасының реакциясы

Tengri Sport тілшісі Шавкат Рахмоновтың қазіргі жағдайын білу және тараған ақпаратқа қатысты команданың реакциясын анықтау үшін бапкері Эдуард Базровқа хабарласты.

Маман Рахмоновтың мансабын аяқтауға ниеті жоқ екенін мәлімдеді. Базровтың айтуынша, қазақстандық файтер қазір қалпына келу үстінде және тұрақты жаттығулар өткізіп жүр.

"Иә, Шон Брэдидің Шавкат туралы айтқанын естідім, бірақ мұндай ақпарат жоқ. Аяғы грэпплинг пен күрестен толыққанды жаттығуларды есептемегенде, бар күшімен жұмыс істеуге мүмкіндік береді. Ол күрес бойынша әдістерді пысықтап, бокс бойынша жаттығу тапсырмаларын орындай алады. Сондықтан оның пікірі маған түсініксіз. Оның бұл ақпаратты қайдан алғанын, оған кім айтқанын білмеймін", - деді бапкер Tengri Sport-қа берген сұхбатында.

Бапкер Шавкаттың аяғын әлі де емдеп жүргендіктен, қазірше толыққанды жаттығу лагерлерін өткізе алмайтынын растады.

"Әрине, оның толыққанды лагерьлер өткізу керек және белгілі бір қарсыластарға арнайы дайындалу қажет дегені дұрыс. Палуанға қарсы палуандармен, соққы берушіге қарсы соққы берушілермен жұмыс істеп, толық дайындықтан өту керек екені құпия емес. Біз әрқашан үш лагерь өткіземіз.

Біріншісін өз үйімізде, Алматыда өткізіп, алғашқы дайындықты жасаймыз. Екінші дайындықты халықаралық жиында, ал үшіншісін тікелей жекпе-жек өтетін жерде өткіземіз. Бұл тұрғыда мен онымен келісемін.

Бүгінгі таңда Шавкат толыққанды лагерь өткізе алмайды. Мысалы, халықаралық жиынға шығып, ол жақта жаттығу жасап, күресіп, грэпплингпен айналысып, толық күш түсіруге мүмкіндігі жоқ. Ол аяғын қалпына келтіріп жатыр, қазіргі уақытта бұл оңай шаруа емес", - деді маман.

Дегенмен, Базров Рахмоновтың жарақаттан және отадан кейінгі қалпына келу процесі қарқынды жүріп жатқанын да атап өтті.

"Қайталап айтамын, барлығы жақсы қалпына келуге бет алды. Ота өте сәтті өтті, қалпына келу де қазір жақсы жүріп жатыр. Ең бастысы, оның өзінде ниет бар. Ол аяғын шынықтырып, көптеген жаттығулар жасап жүр, залда күніне кемінде бір рет болады", - деп атап өтті Базров.

Рахмонов жекпе-жекке қашан оралады?

Рахмоновтың қашан қалпына келетіні және октагонға қашан оралатыны туралы сауалға Эдуард Базров, егер бәрі жоспар бойынша жүрсе, "Номад" 2027 жылдың көктеміне қарай жекпе-жекке дайын болатынын айтты.

"Шавкаттың оралуына келсек - бұл ақпан немесе наурыздың басы, шамамен осы уақыттар. Егер бәрі дұрыс болса, біздің сценарийіміз бойынша жүрсе (әзірге солай болып жатыр), онда ол шамамен осы мерзімде оралуы мүмкін", - деді бапкер.

Шавкат Рахмонов екі жылға жуық уақыт бойы жекпе-жекке шыққан жоқ

Естеріңізге сала кетейік, жеңіліп көрмеген қазақстандық Шавкат Рахмонов 2024 жылдың 8 желтоқсанында өткен UFC 310 турнирінен бері сегізбұрышқа шықпады. Ол кезде Рахмонов төрешілердің бірауыздан қабылдаған шешімімен ирландиялық Иэн Гэрриді жеңген болатын.

Бастапқыда бұл жекпе-жек Шавкат үшін чемпиондық айқас болуы тиіс еді, бірақ сол кездегі белбеу иегері Белал Мухаммад жарақатына байланысты кездесуден бас тартты. Кейінірек Рахмоновтың өзі де жарақат алғанын мәлімдеп, чемпиондық атаққа таласа алмады.

Қазақстандық спортшы біраз уақыт бойы өнер көрсетпегендіктен, оны UFC рейтингінен шығарып тастады.

Шавкат Рахмонов әкесінен айырылды: еліміздің ең танымал спортшысының отбасындағы қайғылы жағдай

Бұл хабардан кейін Қазақстан Президенті Қасым-Жомарт Тоқаев Шавкат Рахмоновқа көңіл айтты.