Шавкат Рахмонов оңалтудан қалай өтіп жатыр?

Жеңіліп көрмеген қазақстандық файтер Шавкат Рахмонов оңалтудан өтіп жатқан видеосын бөлісті, - деп хабарлайды Tengri Sport.

Кадрлардан қазақстандық танымал спортшының жаттығу жасап жатқанын көруге болады.

Бұған дейін спортшының әлеуметтік желідегі профилінде Германияда түскен суреттері жарияланған болатын.

Видеодан кадрлар: instagram.com/shavkatrakhmonov94

Еске сала кетейік, ақпанда Шавкат Рахмоновтың шетелде ота жасатқаны белгілі болған еді. Бұл туралы қазақстандық файтердің бапкері Tengri Sport басылымына айтып берді. Ота спортшыны бірнеше жыл бойы мазалап келген тізедегі сіңір жарақатына байланысты қажет болған.

"Ота жасалды, содан бері біраз уақыт өтті. Қазір ол оңалту кезеңінен өтіп жатыр. Қайта қатарға қосылатын нақты мерзімін айта алмаймын. Бірақ Шавкат та, біздің команда да оның тезірек оралып, жекпе-жектерін жалғастыруы үшін қолдан келгеннің бәрін жасаймыз", - деді маман.

Шавкат Рахмонов 2024 жылдан бері жекпе-жекке шықпады

Еске сала кетейік, қазақстандық спортшы 2024 жылдың 8 желтоқсанында өткен UFC 310 турнирінен бері жекпе-жекке шыққан жоқ. Сол кезде ол төрешілердің бірауыздан қабылдаған шешімімен ирландиялық Иэн Гэрриді жеңген болатын.

Негізінде бұл Шавкат үшін чемпиондық жекпе-жек болуы керек еді, бірақ сол кездегі белбеу иесі Белал Мухаммад жарақатына байланысты айқастан бас тартты.

Кейінірек Рахмоновтың өзі жарақаттарына байланысты жекпе-жектерден бас тартуға мәжбүр болды. Нәтижесінде елдегі ең танымал спортшылардың бірі 500 күннен астам уақыт бойы үзілісте жүр.