Шымкенттегі үлкен стадионның құрылысы екі жыл бұрын басталған еді: қазір жағдай қалай?

Фото: ©️ Tengrinews.kz / Әлімжан Аманжол / Роман Павлов

Шымкентте Қазақстандағы ең ірі стадионның құрылысы басталғаны туралы 2024 жылы жарияланған болатын. Бір жыл бұрын болашақ аренаның орнында тек қоршау тұрған еді. Tengri Sport тілшісі құрылыс алаңына қайта барып, аренаның қазіргі жай-күйін біліп қайтты.

2024 жылғы маусымның аяғында Шымкент әкімі Ғабит Сыздықбеков жаңа стадионның іргетасын қалау рәсіміне қатысты.

2026 жылғы жазына қарай қоршаудың ішінде іргетас пайда болды – болашақ аренаның нобайы енді анық көрінеді.

Шымкенттіктердің жаңа стадион туралы ойы қандай?

Tengri Sport тілшісі жергілікті тұрғындармен жаңа арена туралы сөйлесіп үлгерді. Қала тұрғындары стадионның ашылуын асыға күтіп жүргенімен, құрылысқа қатысты сұрақтары бар.

– Тасы 2024 жылы қаланып, 2025 жылы өзгеріс болмағанын, ал қазір тек іргетасы барын ескерсек, ол қашан салынып бітеді деп ойлайсыз?

"Иә, стадион 2026 жылы дайын болады деп уәде бергендері есімде. Кейін 28-жылы бітеді деген жаңалықты көрдім. Құрылыстың аяқталуын күтіп жүрмін, өйткені бізге жаңа стадион өте қажет – қазіргісі біраз ескірді, оның үстіне сыйымдылығы да аз. Қазір әр матчте билеттер толық сатылып кетеді (sold-out), сондықтан дамуымыз керек, алға қадам басуымыз қажет. Жаңа стадион бізге өте керек", - деді жанкүйерлердің бірі.

Шымкенттік такси жүргізушілерінің бірі стадионға тек бір жағынан кіруге болатынына және оның айналасында әлі көлік айрығының жоғына қынжылды.

"Міне, көрдіңіз бе, жол біреу-ақ, ал стадион салынып жатыр. Бұл дұрыс емес қой. Сен осы туралы жаз, өз жұмысыңды істе, бұл не масқара деп жаз", - дейді жүргізуші.

Айта кетейік, Қазақстандағы ірі ареналардың маңында кептеліс мәселесі жиі туындайды – атап айтқанда, Астана мен Алматыда ұлттық құраманың матчтері өтетін күндері стадион маңына көлік көп жиналып, соның салдарынан жол қозғалысы қиындайды.

Алып стадион: құрылыс барысы туралы не белгілі

Еске салайық, қазір Қазақстандағы ең үлкен стадион – 30 мың адамға арналған "Астана Арена". Шымкенттегі болашақ стадион 35 мың көрерменге лайықталады және бұл Қазақстан үшін рекорд көрсеткіш болуы мүмкін.

Дегенмен, Шымкент қаласының құрылыс басқармасы жаңа стадионның құрылыс мерзімі мен құны туралы нақты ақпарат беруге әлі дайын емес.

"Жобада 35 мың орындық стадион құрылысы қарастырылған. Қазір бұл нысан бойынша жобалау-сметалық құжаттама әзірленіп жатыр. Сонымен қатар, нысанда қадалық іргетасты орнату (қадаларды бетонмен құю) жұмыстары жүргізіліп жатыр. Қада жұмыстары аяқталған соң, қажет конструктив есептеулер жүргізіліп, оның нәтижелері жобаны одан әрі әзірлеу үшін жобалау ұйымына жіберіледі. Нысанның құны жобалау жұмыстары толық аяқталғаннан кейін анықталады", - деп мәлімдеді басқарма біздің сауалымызға берген жауабында.

Тәуелсіздік алғаннан бері Қазақстанда қанша стадион салынды?

Еске салайық, Тәуелсіздік алғаннан бері Қазақстанда үш стадион салынды: "Астана Арена", "Түркістан Арена" және Қызылордадағы "Қайсар-Арена". Бұл ретте тек елордалық арена үлкен сыйымдылыққа ие.

Бұған дейін Туризм және спорт министрлігі біздің сауалымызға берген жауабында Қазақстанда 13 жаңа стадионның құрылысы жүріп жатқанын мәлімдеген болатын – олар Ақтөбе, Петропавл, Атырау, Ақтау, Шымкент, Семей, Өскемен, Алматы, Қарағанды, сондай-ақ Көкшетау, Тараз және Павлодар қалаларында бой көтермек.

Жоспарланған стадиондардың бірі – Астанадағы Мұңайтпасов атындағы арена – сәуірде 94 пайызға дайын болған еді.