Қысқа бағдарламадан кейін 19 жастағы мәнерлеп сырғанаушы 11-орынға тұрақтады - каскадты орындай алмауы қорытынды нәтижеге әсер етті. Алайда еркін бағдарламада Самоделкина ширақтық танытып, осы маусымдағы ең үздік нәтижесін (137,56) көрсетті.
Нәтижесінде Софья жалпы 198,59 ұпаймен бесінші орынға ие болды. Қазақстандық спортшы көшбасшы жапониялық Ами Накаидан (236,81) 40 ұпайға жуық артта қалды.
Айта кетейік, Софья жеке рекордынан бөлек, әйелдер арасындағы мәнерлеп сырғанаудың ең күрделі элементтерінің бірі - үштік аксельді орындаған алғашқы қазақстандық атанды.
"Бүгін таңертең, өнер көрсету алдындағы жаттығуда үштік аксельді орындауды мүлдем жоспарламаған едім. Рафаэльден (бапкер Арутюнян - ред. еск.): "Қалай ойлайсың, бәлкім, байқап көрерміз?" деп сұрадым. Ол: "Сенің шешіміңді қолдаймын, бірақ үштік аксельді орындайтын болсаң, бағдарламаңның келесі элементтерін ұмытпа", - деп жауап берді.
Нәтижесінде мен өте жақсы өнер көрсеттім. Бұған дейін мен осы еркін бағдарламаны үштік аксельмен орындап көрмеген едім. Сондықтан бүгін бұл элементті алғаш рет әрі таза орындап шықтым", - деді Софья Golden Skate-ке берген сұхбатында.
Бұған дейін жаттығуларда Элизабет Тұрсынбаева үштік аксельді бірнеше рет орындаған, алайда ресми жарыстарда бұл элементті бағындыра алмады.
Сәтті өнер көрсеткеннен кейін Самоделкина жанкүйерлеріне қазақ тілінде алғыс айтты.
"Бәріне сәлем! Қолдауларыңыз үшін көп рақмет! Алға!" - деп жазды ол әлеуметтік желіде.
Софья Самоделкина әлемдік рейтингтің үздік 10-дығына кірді
Айта кетейік, АҚШ-тағы Гран-при кезеңінде бесінші орын алғаннан кейін қазақстандық спортшы әлемдік рейтингтегі ең үздік он мәнерлеп сырғанаушы қатарына кірді.
Рейтингте жапониялық Монэ Тиба көш бастап тұр.
Айта кетейік, енді Софья Самоделкинада жарыстарға қатысу бойынша үзіліс болады. Қазір ол Калифорнияда жаттығып жүр. Ал 26 желтоқсанда Almaty Arena мұз айдынына шығады.