Соңғы минуттардағы гол Қазақстан - Словакия матчінің тағдырын шешті

Кездесу C дивизионы 3-тобының екінші туры аясында Кошице қаласындағы "Кошицка футболова арена" стадионында өтті.

Нидерландылық маман Джон ван’т Схип үшін бұл матч ұлттық құраманың бас жаттықтырушысы ретіндегі екінші ойыны болды. Алғашқы кездесуде Фарер аралдарымен тең түскен болатын - 1:1.

Айта кетейік, Словакия құрамасын қазақстандық футболмен жақсы таныс маман жаттықтырады. Владимир Вайсс 2012–2015 жылдар аралығында "Қайратта" жұмыс істеп, алматылық клубпен бірге Қазақстанның екі кубогін жеңіп алған.

Қазақстан құрамасының Словакияға қарсы матчтегі құрамы

Стас Покатилов (Қ), Арсен Әшірбек, Темірлан Ерланов, Нұралы Әліп, Наурызбек Жагоров, Исламбек Қуат, Дінмұхамед Қараман, Исмаил Бекболат, Жасұлан Әмір, Станислав Басманов, Рамазан Кәрімов.

Кездесу барысы

Алаң иелері матчтің 26-минутында алғашқы голды соқты. Немістің "Штутгарт" клубының ойыншысы Лео Зауэр мергендігімен көзге түсті.

Алайда 35-минутта Қазақстан есепті теңестірді: Рамазан Кәрімов қарсыластың айып алаңының шетінде допты қабылдап алып, қақпаның жоғарғы бұрышына дәл соққы бағыттады.

Үзілістен кейін Қазақстан құрамасының бас жаттықтырушысы бір ауысым жасап, Исмаил Бекболаттың орнына Александр Мрынскийді шығарды.

60-минутта Станислав Басманов пен Жасұлан Әмірдің орнына алаңға Ғалымжан Кенжебек пен Рамазан Оразов шықты.

72-минутта Исламбек Қуат жарақатына байланысты алаңнан кетіп, оның орнына Дамир Қасаболат ойынға қосылды.

82-минутта Словакия бұрыштама добын орындау мүмкіндігіне ие болды. Ондрей Дуда допты жақын бағанаға асырды, сол жерде мадридтік "Атлетико" сапында өнер көрсететін Давид Ганцко әуедегі тартыста жеңіске жетіп, допты қақпаға баспен дәл тоғытты.

Жіберіп алынған голдан кейін Қазақстан бесінші ауысымын жасап, Арсен Әшірбектің орнына Елхан Астановты шығарды, бірақ есепті теңестіру мүмкін болмады.

Матчтың қорытынды есебі - 2:1, Словакия құрамасының пайдасына.

Осы матчтен кейін ұлттық құрама Астанаға оралып, Молдовамен (2 қазан) және Фарер аралдарымен (6 қазан) ойнайды.