Сот 19 жастағы қазақстандық хоккейшінің өліміне қатысты іске нүкте қойды

Облыстық сот қаулысына сәйкес, қақпашының бұрынғы командаласы Андрей Лагунов Қазақстан Республикасы Қылмыстық кодексінің 104-бабы 1-бөлігі (абайсызда өлімге әкеп соғу) бойынша кінәлі деп танылды. Үкім - 3 жыл 9 ай бас бостандығынан айыру және марқұмның ата-анасына 20 миллион теңге көлемінде моральдық зиян өтеу.

Екі тарап та жоғары сатыға шағымданды. Қаза болған жігіттің ата-анасы жазаны 7 жылға дейін қатаңдатуды, ал Лагуновтың тарапы мерзімді азайтуды сұрады.

Нәтижесінде кассациялық сот үкімді өзгеріссіз қалдырып, осылайша атышулы іске нүкте қойды.

"Кассациялық сатыдағы сот Лагуновтың кінәсіз екенін және "Торпедо" ХК спортшысы Иван Пыленоктың өліміне қатысы жоқ деп санаған қорғаушылардың уәждерін, сондай-ақ жәбірленуші тарап пен олардың өкілдерінің уәждерін тыңдап, апелляциялық үкімді өзгеріссіз, ал қорғаушылардың кассациялық шағымдарын қанағаттандырусыз қалдырды.

Яғни, Лагунов кінәлі деп танылып, жазасын орташа қауіпсіздік мекемесінде өтей береді және Иванның ата-анасына 20 миллион теңге моральдық зиян төлеуі тиіс.

Естеріңізге сала кетейін, судья Е. С. Белавинаның төрағалығымен бірінші сатыдағы сот оның іс-әрекетін онша ауыр емес қылмысқа қайта саралап, амнистияны қолдану арқылы жазадан мүлдем босатып жіберген болатын. Бұл үкімнің күшін апелляциялық саты жойып, Лагунов қамауға алынды", - деді Tengri Sport-қа марқұмның ата-анасының адвокаты.

Қазақстандағы хоккейшінің командаласымен жанжалдан кейінгі өлімі: не болды?

Еске салайық, қайғылы оқиға 2024 жылғы 2 тамызда Б. Александров атындағы Спорт сарайының дәлізінде болған. "Торпедо" жастар хоккей командасының қақпашысы Иван Пыленоктың (2005 ж.т.) денсаулығы кенет сыр беріп, оған медициналық көмек көрсетіліп, жедел жәрдем шақырылған. Клубтың хабарлауынша, көрсетілген шараларға қарамастан, жігіт ауруханада көз жұмды.

Біраз уақыттан кейін әлеуметтік желілерде видео пайда болды, онда Иван есінен танып қалмас бұрын оның негізгі құрам ойыншысы, ресейлік форвард Андрей Лагуновпен ерегісіп қалғаны көрінеді.

Марқұмның ата-анасы шабуылшыны ұлдарының өліміне айыптады.

Талқылау барысында сот жәбірленушінің өліміне Лагуновтың абайсыздығы себеп болған деген қорытындыға келді. Лагуновтың өз іс-әрекеті нәтижесінде жәбірленушінің қаза болуын қалағанын көрсететін нақты деректер іс бойынша анықталған жоқ.

Сотталушының ниеті қылмыстық немқұрайлылықпен сипатталады: ол мойын тұсына қолмен әсер ету кезінде, тиісті мұқияттылық пен сақтық танытқанда өлім түріндегі қоғамға қауіпті салдарды болжай алуы тиіс еді, бірақ оны болжамаған.

Сот пікірінше, қылмыс жасауға Лагуновтың өз желдеткішін қайтарып алу ниеті себеп болған.

"Куәгер Т. Р. Кизекпаев оқу-жаттығу жиынынан кетерде А. А. Лагуновтың келісімімен оның желдеткішін өзіне қалдырғанын, кейін оны кіші команданың ойыншысы Р. М. Датаевқа бергенін айтты.

Соңғысы жиыннан оралған соң анасына ескі желдеткішті берген. Кейін ол Р. Датаевтан желдеткішті И. С. Пыленок ауыстырып жіберді дегенді естіп, бұл туралы А. А. Лагуновқа хабарлаған, ал ол өзі шешетінін айтқан", - делінген қаулыда.

Лагунов командаласынан желдеткішті немесе оның ақшасын қайтаруды талап еткен, бұл жанжалға ұласып, ақыры жас жігіттің өліміне әкеп соқты.

Лагуновтың жәбірленуші оны балағаттады деген уәждері куәгер Манажановтың тұрақты айғақтарымен теріске шығарылды, оның сөздеріне күмән келтіруге негіз жоқ.