+7 (777) 001 44
99
Қазақстанның ең көп марапатқа ие болған боксшысы Назым Қызайбай Әлем кубогі кезеңіндегі төрешілікке қатысты пікір білдіріп, болған жайтқа өз нұсқасын айтты, деп хабарлайды Tengri Sport.
Фос-ду-Игуасуда (Бразилия) өткен Әлем кубогінің алғашқы кезеңінде елдің ең титулды боксшысы, әлемнің үш дүркін чемпионы және Олимпиаданың қола жүлдегері Назым Қызайбайдың күтпеген жерден жеңілуі Қазақстан құрамасы үшін басты соққы болды.
Турнирдің 1/8 финалында қазақстандық спортшы польшалық Виктория Рогалиньскамен қолғап түйістірді.
Жекпе-жек толық уақытқа созылып, төрешілердің көпшілік шешімімен (4:1) польшалық боксшының пайдасына аяқталды.
Жекпе-жектен кейін Назым Қызайбай әлеуметтік желідегі парақшасында нәтижеге көңілі толмайтынын, бірақ берілмейтінін жазды.
"Сөз жоқ. Әркім өзіне керегін көреді… Мен жұмысымды жалғастырамын", - деп жазды Қызайбай әлеуметтік желілерде.
Жазбаның астына пікір қалдырған бокс жанкүйерлері төрешілер шешімімен келіспейтіндерін айтып, жеңіс Қызайбайға берілуі керек екенін жарыса жазды.
"Өкінішті-ақ, басшылық мұндай әділетсіздікке ештеңе істей алмайды, ал біздің спортшылар бәріне жемтік болып жүр. Сіз мықтысыз! Тек алға!";
"Жеңісті тартып алды! Бұл турнирдегі төрешілікке не жорық?? Назымның таза жеңісі еді. Осындай маңызды турнирде осындай төрешілік болуы - масқара!";
"Назым, сен таза жеңдің, екі рет қайталап көрдім, төрешілігі түсініксіз болды. Қарсыласыңның өзі аң-таң. Назым - чемпион!" - деп жазды әлеуметтік желі қолданушылары.
Tengri Sport тілшісі Назым Қызайбайға хабарласып, оның жекпе-жек пен төрешілік туралы ойын білді.
Сұхбат барысында ол іштей жеңіске жеткенін сезгенін, бірақ төрешілердің шешімі басқаша болғанын айтты. Сондай-ақ ол үшін ең бастысы - алған тәжірибе екенін атап өтті.
"Бірінші раундты сенімді түрде жеңдім деп есептеймін. Мен үшін бұл 5:0 болды, бірақ 4:1 деп берді. Екінші раундта тактиканы аздап өзгертіп, көбірек алға ұмтылып, белсенді жұмыс істегім келді. Мүмкін бұл толықтай дұрыс шешім болмаған шығар, өйткені бірінші раундта мен көбіне қарсы шабуылда ойнауға басымдық берген едім", - деді Назым Қызайбай Tengri Sport-қа берген сұхбатында.
Қызайбайдың айтуынша, оның соққылары дәлірек тиген, ал қарсыласы көбіне шегініп жүріп, жан-жаққа қашумен болған.
"Үшінші раундта да бірінші нөмірмен жұмыс істедім. Жаттықтырушылар үнемі критерийлер туралы, яғни бірінші нөмір болып, белсенді әрі агрессивті жұмыс істеу керектігін айтатын. Жалпы, жеңісімді "тартып алды" немесе "жеңілдім" деп кесіп айта алмаймын - мұнда әркім өз қалауынша бағалай алады. Мен үшін ең бастысы - алған тәжірибем және алдағы уақытта немен жұмыс істеу керектігін түсінгенім", - деп толықтырды ол.
Айта кетейік, бұл Назым Қызайбайдың жаңа салмақ дәрежесіндегі алғашқы жарысы. Бұған дейін қазақстандық боксшы 48 келіге дейінгі дивизионда өнер көрсетсе, енді 54 келіге дейінгі санатқа ауысты.
Қызайбай бұл салмақта өзін жайлы сезінетінін, алайда бабында болмағанын және бейімделу үшін әлі уақыт қажет екенін айтты.
"Бұл менің осы салмақ дәрежесіндегі алғашқы жарысым болды. Бабымда болдым деп айта алмаймын - бұл мен үшін көбіне өзімді сынау кезеңі болды: жаңа салмақта өзімді қалай сезінемін, қарсыластар арасында қалай көрінемін дегендей. Қазір мен үшін бұл көбіне бейімделу процесі: 5–6 келінің айырмашылығы, әрине, сезіледі, бұған үйрену керек. Бірақ жалпы бұл салмақта физикалық немесе функционалдық тұрғыдан өзімді жақсы сезінемін", - деп бөлісті Назым.
Еске сала кетейік, бокстан Әлем кубогының бірінші кезеңі Бразилияның Фос-ду-Игуасу қаласында өтіп жатыр және ол 2026 жылдың 26 сәуірінде аяқталады.
Instagram-дағы бұл жарияланымды көру
