“Сүйікті жерім емес“: еуропалық бапкер Қазақстан туралы пікір білдірді

Фото: instagram.com/fctobol/

Литвалық "Паневежистің" бас бапкері Тони Коркеакуннас Қазақстанға турист ретінде барғысы келмейтінін мәлімдеді. Келесі аптада ол командасымен бірге Қостанайда Конференция лигасының матчін өткізеді, деп хабарлайды Tengri Sport lrt.lt.

Коркеакуннас бұл мәлімдемені командасы Конференция лигасы іріктеу кезеңінің екінші раундында қазақстандық "Тобылмен" тең түсіп (1:1), жеңісті қолдан шығарып алғаннан кейін жасады. Қарымта кездесу 30 шілдеде өтеді.

"Егер мен турист ретінде баратын болсам, басқа жерді таңдар едім – бұл менің демалыс үшін ең сүйікті орным емес. Бірақ біз ол жаққа тек бір мақсатпен – жеңіс үшін бара жатырмыз. Осы матчтен кейін біз тәжірибе жинақтадық және не істеу керектігін білеміз. Біз тек жеңіс туралы ойлаймыз", - деді жаттықтырушы баспасөз мәслихатында.

Айта кетейік, "Тобылдың" сырт алаңдағы матчте тең есеппен шектелмей, жеңіске жетуге де мүмкіндігі болған еді. 60-минутта Асхат Тағыберген пенальтиді сәтті орындай алмады.

"Паневежис" - "Тобыл": матчке шолу

Еске сала кетейік, Қазақстан атынан еурокубоктардың күзгі кезеңіне жолдама алу үшін "Тобылдан" бөлек "Қайрат" та күресін жалғастырып жатыр – алматылықтар сырт алаңда Кипрдің "Омониясына" қарсы матчте 1:0 есебімен есе жіберді.

Еліміздің еурокубоктардағы тағы екі өкілі – "Елімай" мен "Астана" іріктеудің бірінші раундынан кейін Конференция лигасынан шығып қалды.