Тарихи жетістіктер мен 84 медаль: Қазақстанның Азиадада қалай өнер көрсетті?

Бұл туралы республиканың Туризм және спорт министрлігінің баспасөз қызметі мәлімдеді.

2023 жылғы Ханчжоудағы ойындарда Қазақстан 11-орынды иеленген болатын. Осылайша, алдыңғы Азиадамен салыстырғанда команда үш сатыға көтеріліп, алтын медальдар санын арттырды. Сонымен қатар, Қазақстан құрамасы биылғы Ойындарда олимпиадалық спорт түрлері бойынша бірқатар тарихи нәтижеге қол жеткізді.

Басты жетістіктердің бірі – қазақстандық боксшылардың 12 жылдық үзілістен кейінгі жеңісі. Бұған дейін құрама кейінгі рет 2014 жылы Азия ойындарының алтынын алған еді. Өткен екі Азиадада командада алтын медаль болған жоқ. Жапонияда 70 келіге дейінгі салмақ дәрежесінде Төрехан Сабырхан және 90 келіден жоғары салмақта құрама капитаны Айбек Оралбай чемпион атанды.

Шпагамен семсерлесуден ерлер құрамасы финалда Оңтүстік Кореяны 43:42 есебімен жеңіп, Азиаданың тарихи алтынын иеленді. Қарсыластар командасының сапында Рио-2016 Олимпиадасының жекелей сындағы чемпионы Пак Сан Ён өнер көрсетті.

"Бұл табыс тарихи маусымның бір бөлігі болды: команда Азия чемпионатын жеңіп, алғаш рет әлем чемпионы атанды, содан кейін Азия ойындарында топ жарды. Бұған дейін бірде-бір команда бір маусымда мұндай нәтижеге қол жеткізе алмаған", - делінген баспасөз хабарламасында.

Академиялық есуден Қазақстан тарихындағы тұңғыш Азия ойындарының алтынын Владислав Яковлев пен Иван Чернухин жеңіп алды.

Таэквондодан ел тарихындағы алғашқы Азиада алтынын 58 келіге дейінгі салмақта сынға түскен Тамирлан Тілеулес сыйлады.

Алексей Луценко тарихи нәтиже тіркеді: қазақстандық велошабандоз жазғы Азия ойындарындағы алтын медальдарын алтыға жеткізіп, жеңіс саны бойынша елдің титулы көп спортшысы атанды. Ал Рината Сұлтанова Қазақстанның әйелдер велоспорты тарихында алғаш рет жекелей жарыста алтын иеленді.

Каратэден Жоламан Биғабыл мен Софья Берульцева екі алтын медаль жеңіп алды. Берульцева үшін бұл Азия ойындарындағы екінші жеңісі болды. Ойындардың бағдарламасына алғаш рет енген аралас жекпе-жек (ММА) турнирінде Қазақстан бірден көшбасшылар қатарына қосылды: Еркінғали Бүркіталин мен Қадырбек Шынбаев чемпион атанса, Санжар Әділов қола жүлдені иеленді.

Дзюдодан ұлттық құрама алғаш рет жекелей сында төрт финалға дейін жетті. Елдос Сметов, Әбиба Әбужақынова, Әділет Алмат және Ажар Асхат Жапония өкілдеріне есе жіберіп, күміс жүлдегер атанды. Тағы бір күміс медальді команда аралас турнирде иеленді. Бес кездесудің бәрінде де Қазақстанның қарсыласы Жапония құрамасы болды.

Спорттық гимнастикадан Милад Карими еркін жаттығуда күміс алды. Қазақстан бұл бойынша 32 жылдан кейін алғаш рет Азиада тұғырына қайта оралды.

Еркін күрестен құрама 2023 жылғы Азия ойындарындағы жүлдесіз кезеңнен кейін үш қола медаль жеңіп алды. Әйелдер командасы да нәтижені жақсартты: 2023 жылы бір күміс болса, биыл спортшылардың қоржынында бір күміс пен екі қола бар.

Еске салайық, XX жазғы Азия ойындары 19 қыркүйек пен 4 қазан аралығында өтті. Ресми ашылу салтанаты Нагоя қаласында болды. Ойындарда Қазақстан намысын 558 спортшы қорғады.

Жарыс бағдарламасында 43 спорт түрі мен 71 пән болды. Оған 45 ұлттық олимпиадалық комитеттен (Азия елдері мен аймақтары) 11 мыңнан аса спортшы, сондай-ақ, босқындар командасы (OCA Refugee Team) қатысты.

Әлеуметтік желілердегі парақшаларымызға жазылыңыз: Telegram және Instagram.

Бізге қосылыңыз және ең маңызды жаңалықтардан хабардар болыңыз!