“Тартысты жекпе-жектер керек“ - қазақстандық файтер титулдық кездесудегі нокаут туралы

32 жастағы файтер жеңіл салмақтағы кездесу тағдырын бірінші раундта шешті.

Бастан бағытталған пәрменді соққыдан кейін қарсыласы октагоннан тұра алмады, ал төреші Бекзатты жеңімпаз деп жариялады.

Спортшының айтуынша, ол жекпе-жекті мерзімінен бұрын аяқтауды жоспарлаған.

"Мен кездесудің барлық аспектісіне дайын болдым, дегенмен алдыма нокаутпен жеңіске жету мақсатын қойдым, өйткені лигаға дәл осындай тартысты жекпе-жектер керек!" - деді ол Tengri Sport тілшісіне берген сұхбатында.

Айта кетейік, Бекзат Жасия үшін қырғызстандық спортшыны жеңу Alash Pride лигасындағы титулын алғаш рет қорғауы болды. Дегенмен ол қазір шетелде бағын сынау туралы ойлап жүр.

"Иә, әрине, әлемдегі нөмірі бірінші лигада өнер көрсету - менің басты мақсаттарымның бірі. Екінші жағынан, өзім өнер көрсетіп жүрген Alash Pride лигасын дамытып, оған әлемнің түкпір-түкпірінен мықты файтерлерді шақырып, деңгейін көтергім келеді", - деп атап өтті спортшы.

Бұл ретте жеңістен кейін Бекзат жеңіл салмақтағы белбеуін босатып, 66 келіге дейінгі ауырлау салмақ дәрежесіне ауысатынын мәлімдеді.

Әлем чемпионы Азиадаға қатысқысы келеді

Еске сала кетейік, биыл аралас жекпе-жек тарихта алғаш рет Азия ойындарының бағдарламасына кірді. Жасия ММА-дан әлем чемпионатын жеңіп алған болатын, енді ол құрама сапында Азиадаға барғысы келеді.

"Егер маған Азия ойындарына қатысуды ұсынса, мен 66 келі салмақ дәрежесінде ел намысын қорғауға қуана барар едім. Өйткені Қазақстан құрамасы сапында жарыстарға қатысу - үлкен мәртебе, әсіресе төрт жылда бір өтетін Азия ойындарында өнер көрсетудің орны бөлек", - деді ол.

Жапониядағы Азиадада аралас жекпе-жектен жарыстардың екі түрі болды - заманауи және дәстүрлі. Заманауи түрінде 60 және 71 келіге дейінгі салмақтар, ал дәстүрлі түрінде 65 және 77 келіге дейінгі салмақ дәрежелері ұсынылды.

Нәтижесінде қазақстандықтар екі алтын және бір қола жеңіп алды. Заманауи ММА-да Жасияның салмағы болмады, ал дәстүрлі түрінен Қазақстан атынан Санжар Әділов өнер көрсетіп, қола жүлдені иеленді.

Қазақстан мен Қырғызстан файтерлері арасындағы титулдық жекпе-жек бірінші раундта нокаутпен аяқталды

“Жай ғана хайп жинағысы келді“: шешен спортшысы Шавкат Рахмоновқа сес көрсетті