Төрехан Сабырхан Қазақстанға бокстан Азиаданың алғашқы алтынын сыйлады

Жарыстың финалдық кезеңінде қазақстандық боксшы иорданиялық спортшы Зеяд Ишаишпен қолғап түйістірді.

Жекпе-жек барысы

Жекпе-жек басталмас бұрын иорданиялық боксшы Сабырханды кеудесінен итеріп жіберді. Гонг соғылғаннан кейін боксшылар бір-біріне ұмтылып, рингтің ортасында бірден соққы алмаса бастады.

Уақыт өте келе боксшылар арақашықтықты ашты, бұл бойы ұзын қазақстандық үшін тиімді болды. Сабырхан орта қашықтықтан шабуылдап, қарсыласына бой бермеді. Төрешілер алғашқы раундта жеңісті бірауыздан қазақстандыққа берді.

Екінші раундта Ишаиш бірден жақын келіп, арақашықтықты қысқартып, қазақстандықты арқанға тақады. Сабырхан болса, өзіне қолайлы қашықтыққа шығуға тырысып, шегіне жүріп қарсы шабуыл жасады. Раунд аяқталуға бір минут қалғанда қазақстандық бастаманы өз қолына алып, бірінші нөмірмен жұмыс істей бастады. Төрешілер екінші раундта да жеңісті қазақстандыққа берді.

Шешуші раундта Сабырхан иорданиялықтың үстіне соққы жаудырды. Алдымен ол ауыр хуктар бағыттаса, кейін жылдам комбинациясын іске асырды. Ишаиш те жауап қатуға тырысты, бірақ қазақстандық байсалдылықпен қорғанып, соққылардан жалтарып отырды.

Үш раундтың қорытындысы бойынша Төрехан Сабырхан төрешілердің бірауыздан қабылдаған шешімімен жеңіске жетіп, құрама қоржынына Азия ойындарының оныншы алтынын және бокстан ұлттық құраманың алғашқы жоғары дәрежелі медалін салды.

Естеріңізге сала кетейік, алдыңғы кезеңде Төрехан Сабырхан өзбекстандық Шавкатжон Болтаевты айқын басымдықпен жеңген болатын. Қазақстандық боксшы бүкіл жекпе-жек бойы шабуылда үстемдік етіп, соққыларды дарытпады, нәтижесінде 5:0 есебімен жеңіске жетті.

Боксшының туған ағасы Махмұд Сабырхан турнирдің жартылай финалында өнер көрсетуін аяқтап, қола медаль иеленді.

Алайда оның жеңілісі туралы шешім дау тудырды. Қазақстан бокс федерациясының өкілдері Tengri Sport тілшісіне берген сұхбатында шешімге наразылық білдіретінін айтты.

Айта кетейік, бүгін финалда Қазақстан құрамасының капитаны Айбек Оралбай да жекпе-жек өткізеді. Азиаданың алтын жүлдесі үшін ол өзбекстандық Жахонгир Зокировпен кездеседі.