Қазақша
Русский
Шымкентте өткен үй турнирінде қазақстандық үміт күттірген теннисшілер Әмір Омарханов пен Заңғар Нұрланұлын тәжірибелі қарсыластары жеңіп кетті. Tengri Sport осы жағдайдың себебін анықтап, жас жұлдыздардың ересектер деңгейіндегі болашағына баға беріп көрді.
Әмір мен Заңғар соңғы бірнеше жылдан бері қазақстандық теннистің басты үміті ретінде аталып келеді.
Екеуі де жасөспірімдер арасындағы "Үлкен дулыға" турнирінің шешуші кезеңдеріне дейін жеткен, екеуі де шетелде жаттығады және қазір ересектер деңгейіндегі алғашқы қадамдарын жасап жатыр.
Бұл бағыттағы кезекті қадам - Шымкенттегі Challenger сериясының турнирі болды. Олар бұл додаға стандартты талаптарды айналып өтіп, спортшыға немесе командаға берілетін арнайы шақырту - wild card арқылы қатысқан.
Мықтылармен шайқас және жарақаттар
Әмір Омарханов пен Заңғар Нұрланұлы турнирдің алғашқы айналымдарда өнерлерін аяқтады.
Нұрланұлына екі жолы да бірінші болып тіркелген мықты қарсыластар - Иван Гахов пен Эдас Бутвилас түскен. Деңгейдің жоғарылығына қарамастан, Заңғардың өзі жарыстан ерте шығып қалуына жарақаттар себеп болды деп есептейді.
"Шымкентке дейін бір айға жуық кортқа шықпадым - ішкі бұлшықетімді жарақаттап алдым. Сөйтсем, мен осы жарақатпен өткен жылдың күзінен бастап биыл наурызға дейін, соның ішінде жасөспірімдер арасындағы Australian Open-де де ойнаппын. Барлық факторды ескерсек, өз еліміздегі челленджерде жақсы ойнадым, маған WC берді, ол үшін Қазақстан теннис федерациясына алғыс айтамын, өйткені алғашқы турнирде wild card арқылы өнер көрсеттім.
Төртінші нөмірлі ойыншымен түстім, екінші сетте брейктер болды, сәл ғана сәттілік жетіспеді. Ал екінші турнирде жарыстың бірінші ракеткасымен, өте тәжірибелі қарсыласпен ойнадым. Меніңше, екі турнирде де ойын тәжірибесі жетіспеді", - деді Заңғар тілшімізге берген сұхбатында.
Отандастар дербиі
18 жасар Омарханов үшін Шымкенттегі алғашқы және соңғы матчтер молдовалық Раду Алботтан жеңілуімен және тәжірибелі отандасы Денис Евсеевке қарсы өткен дербимен аяқталды. Ол Евсеевке 6:3; 6:2 есебімен есе жіберді.
"Бұл - мен енді ғана ойнай бастаған жоғары санаттағы турнирлер, сондықтан мұндағы қарсыластардың деңгейі де жоғары. Лайықты ойын көрсетіп, қарсылық таныту, өз ойыныңды өткізу және жеңіске жету үшін шеберлік керек. Сондықтан екі матчті де қысқаша қорытындыласам, ойымдағы тактика мен сызбаны іске асыра алмадым, соның салдарынан ойынды жеңіске айналдыру мүмкін болмады.
Сондай-ақ тізе жарақаты да әсер етті, соның кесірінен жаттығулардан бір айдан астам уақыт үзіліс алдым. Соған қарамастан, ойындар жақсы өтті деп есептеймін және осындай матчтерді көбірек өткізу арқылы мүмкіндіктерім де арта түседі", - деді Әмір тілшімізбен әңгімелесу барысында.
- Сіздің ересектер арасындағы турнирлерде өнер көрсетіп жүргеніңізге бір жылға жуықтады. Жасөспірімдерден ауысу процесін қалай бағалайсыз, рейтингте жоғарылау үшін қазір не кедергі болып жатыр?
"Меніңше, жасөспірімдер теннисінен ересектерге ауысу процесі қалыпты, лайықты қарқынмен жүріп жатыр. Әркімде бұл әртүрлі болады: бірі ерте жарқыраса, бірі кештеу көрінеді. Қазір мен өз ойыным мен нәтижелерімді жақсартуға көңіл бөліп отырмын. Біздің федерация жаттығу процесіне барлық жағдайды жасап берді.
Рейтинг - бұл екінші кезектегі нәрсе деп ойлаймын, сондықтан дәл қазіргі уақытта ересектер турына кіру процесі өте жақсы жүріп жатыр. Әр турнир сайын жаңа бірдеңе үйренемін, мен үшін ең маңыздысы да осы", - деді қазақстандық спортшы.
Тәжірибелі қарсылас Әмір мен Заңғардың болашағы зор деп санайды
Шымкентте Омарханов пен Нұрланұлынан бөлек, Қазақстан құрамасының тәжірибелі мүшелері - Тимофей Скатов пен Денис Евсеев те ойнады. Екеуі де турнирден шығып қалғаннан кейін, жас жұлдыздардың бірін жарыс жолынан шығарған Дениспен сөйлесудің сәті түсті.
- Алдыңғы айналымда сіз Әмір Омархановты жеңдіңіз. Оған үлкен үміт артылып отыр, ал сіз оны оңай жеңіп кеттіңіз. Ол туралы және Заңғардың ойынын көрген болсаңыз, не айтар едіңіз?
"Шындығында, балалар мықты. Көпшілік олардың болашағынан зор үміт күтеді. Бірақ алдын ала болжам жасап, біреу туралы олай айтуға болмайды, өйткені бұл өзінше бір қысым. Олардың өмірінің осы кезеңінде ойында не бар екенін біз білмейміз. Теннис өте қиын спорт түріне айналды, мұнда бәсекелестік басым. Көбі мұны түсінбей, қандай да бір елеспен өмір сүреді.
Олар желілік турнирде ойнайды, ал кейін ересек ойыншыларға қарсы нағыз матчтерге шыққанда бәрі мүлдем басқаша болады. Жаңа жағдайға бейімделе білу, бұл ойынды түсіну керек. Ең бастысы - жарақатсыз және ешқандай артық үмітсіз ойнау қажет. Тек салқынқандылық танытып, өз теннисіңді көрсету маңызды", - деп атап өтті Евсеев тілшімізге берген сұхбатында.
Оның айтуынша, Әмір де, Заңғар да тек жаттығуда ғана емес, адами тұрғыдан да өздерін жақсы жағынан көрсетіп жүр.
- Жалпы Заңғар мен Әмірге келетін болсақ, олар жақсы жігіттер. Олар Синнер сияқты атақты спортшылармен және басқа да көптеген ойыншымен бірге жаттығып, шеберліктерін шыңдап жүр. Олармен бірге жаттығу жасау немесе кортта бірге болу жағымды екенін айтып, бәрі мақтап жатады. Яғни, Қазақстан құрамасының жас мүшелері тәкәппар немесе соған ұқсас мінез көрсетпейді. Бұл тұрғыда өсіп келе жатқан ұрпақтың бар болғаны, өзгелер үлгі тұтып, бой түзейтін жігіттердің бары қуантады. Мен оларға тек сәттілік тілеймін.
- Өз тәжірибеңізден бірнеше кеңес берсеңіз. Жасөспірімдер жарысынан ересектер деңгейіне өту кезеңін қалай еңсердіңіз?
- Шынын айтсам, менде бұл кезең қызықты өтті, өйткені 18 жасымда рейтингте 490-шы орынға көтерілдім, содан кейін теннисті тым оңай спорт түрі деп ойлап, қиялға берілдім. Бұл спортқа 100 пайыз берілдім деп айта алмаймын, өрлеу де, құлдырау да болды.
Мүмкін, өмірімдегі шешуші сәттердің бірі 21 жасымда өз бетіммен кетіп, жеке істеріммен айналысып, қаржыландырудан толық айырылған кезім болған шығар. Кейін теннис бәрібір менің ісім екенін түсініп, өміріме, ісіме деген көзқарасымды қайта қарауым керек деген ой келді.
Ерте ме, кеш пе, бұл өз жемісін береді. Егер сен бір нәрсеге адал болсаң және соған ұмтылсаң, ерте ме, кеш пе, бәрі орындалады – бастысы сену керек.
Айта кетейік, Евсеевтің мансабындағы әлемдік рейтингтегі ең жоғары көрсеткіші – 153-ші орын, оған ол 2024 жылдың жазында қол жеткізді. Қазір ол рейтингте 440-шы орында тұр, бірақ алдағы жылдары үздік 100-дікке кіру үшін күреспек ниетте.
"Қазір кейінгі бес жылдағы ең төменгі рейтингтік сатыда тұрмын. Бұған себеп болған бірқатар жағдай бар. Бірақ қазір жоғалтатын ештеңем жоқ, жай ғана бабыма келіп, өз теннисімді ойнауға тырысып жатырмын. Өз позицияма қайта оралып, нәтижелерді еселеп, ақыры үздік 100-дікке кіремін деп үміттенемін.
Соңғы уақытта жарақаттарым өте көп болды, сондықтан турнирге қатысуды жаңа тыныс ашылғандай және жағымды әсер деп айтуға болады. Өміріңнің белгілі бір кезеңінен өткен соң, тіпті теннистің берген белгілерін де қабылдай бастайсың. Жеңіліп қалғаныма еш қиналмаймын. Егер өзіңді толық арнасаң, ерте ме, кеш пе, теннис құдайы сені марапаттайды", - деді ол.
Денис Евсеев 1993 жылы Алматыда дүниеге келген және жылдар бойы кәсіби турда өнер көрсетіп келеді. Оның қоржынында Challenger сериясындағы турнирлерде 2 жеңіс және ITF деңгейінде 18 жеңіс бар.
Бұдан бөлек, 2025 жылы Денис Дэвис Кубогында Қазақстан құрамасы сапында сәтті өнер көрсетті, ал бұған дейін Азия ойындарында жұптық сында күміс жүлдегер атанған болатын.
Әмір Омарханов пен Заңғар Нұрланұлы туралы не белгілі?
Әмір Омарханов тенниспен Қарағандыда айналыса бастаған. 2024 жылы ол Қазақстан тарихында жасөспірімдер арасындағы "Үлкен дулыға" турнирінің жекелей сынында 1/4 финалға дейін жеткен алғашқы теннисші атанды.
Өткен жылы ол алғаш рет Қазақстан чемпионатын жеңіп алып, ересектер турына ауысты. Қазіргі уақытта ол әлемдік рейтингте 621-ші орында тұр.
"Қазіргі уақытта маусым соңына дейінгі нақты күнтізбем жоқ, сондықтан ол жағдайға байланысты өзгеріп отырады. Топырақ жабынында көбірек ойнауға тырысамын деп ойлаймын, өйткені ол маған өзімді және ойынымды жан-жақты ашуға мүмкіндік береді.
Рейтингке келетін болсақ, жыл соңына дейін жетсем деген нақты бір сан жоқ. Әрине, мен әрқашан мүмкіндігінше көп ұпай жинауға, барынша көп матч пен турнирде жеңіске жетуге ұмтыламын, бірақ қазір ойын тәжірибесіне көбірек көңіл бөліп жүрмін – барынша көп матч өткізіп, тәжірибе жинақтау маңызды.
Егер нақты бір мақсатты алсақ, жылына 60-70 матч өткізгім келеді деп айта аламын. Бұл әрине денсаулығыма да байланысты, сондықтан қазір барлық назар тұрақтылық пен денсаулыққа аударылған, сонда бәрі де сәтті болады деп сенемін", - деді Әмір біздің тілшімізге берген сұхбатында.
Заңғарға келетін болсақ, 17 жастағы теннисші қазір әлемдік рейтингте өзі үшін рекордтық 8-ші сатыда тұр. Өткен жылы ол жасөспірімдер арасындағы US Open турнирінің жартылай финалына дейін жетсе, 2026 жылдың басында жасөспірімдер арасындағы Australian Open жартылай финалына жолдама алды.
Биылғы маусым Заңғар үшін жасөспірімдер турындағы соңғы маусым болмақ. Бірақ ол қазірдің өзінде ересектер деңгейінде өнер көрсете бастады. Заңғардың жоспарында – Оффенбахтағы J500 сериялы турниріне бірінші нөмірлі ойыншы ретінде қатысу, сондай-ақ қалған үш жасөспірімдер арасындағы "Үлкен дулыға" турнирлері бар.
Сондай-ақ алда Заңғарды Еуропадағы бірнеше Futures сериялы турнирлері мен ҚР Президентінің Кубогі күтіп тұр.
+7 (777) 001 44 99
