“Үйде асылған ет мейрамханадағыдан жақсы“ - канадалық хоккейші қазақ тағамдары туралы

Бұған дейін астаналық клуб пен Қазақстан құрамасы сапында өнер көрсеткен канадалық хоккейші Новосібір командасы ойсырай жеңілген матчке қатысты.

Оның қазіргі клубы "Барыстан" 1:7 есебімен ұтылса да, Диц журналистермен тілдесуге ниет білдірді.

"Бұл біз үшін жақсы сынақ болды деп ойлаймын - маусымның басында осындай жағдайға тап болғанымыз дұрыс болды. Мінезіміздің қандай екенін білеміз. Мұндай сәтсіз ойындар бізді біріктіруі тиіс. Біз тиісті қорытынды шығарып, келесі матчке дайындалуымыз керек", - деді Диц тілшімізге берген сұхбатында.

- "Барыс" сіз үшін жат команда емес, осында әр келген сайын қуанатыныңызды айтқан едіңіз. Осындай матчтерден кейін бұл сезіміңіз өзгермей ме?

- Әрине, сапардың мақсаты екі ұпай еншілеу еді, бірақ олай болмады. Нәтижеге көңілім толмайды. Десе де, хоккей ойнаудың өзі бір ғанибет. Трибуна толы болды. Жанкүйерлер келіп, команданы қолдап, Қазақстандағы хоккейге демеу болып жатқанын көру мен үшін үлкен қуаныш, - деді хоккейші.

- Алдағы уақытта Астанаға ойыншы ретінде қайта оралғыңыз келе ме?

- Болашақтың еншісінде, көре жатармыз. Әрине, дөп басып айта алмаймын, бірақ бәрі де мүмкін, - деп жауап берді ол.

Қазақ асханасын ұнатқан канадалық

Еске салсақ, Диц Астанаға 2017 жылы келіп, "Барыста" бес жыл өткізген, содан кейін мәскеулік ЦСКА, екатеринбургтік "Автомобилист", минскілік "Динамо" және омбылық "Авангард" сапында ойнаған.

Бұл ретте хоккейші демалысын Астанада жиі өткізеді - бұған оның 2019 жылы танысқан жұбайы Іңкәр себепші. Қазір жұптың екі баласы бар. Дарреннің айтуынша, ол балаларының бірін Аштынбек немесе Аштынтай деп атайды.

- Демалыс кезінде Астанада көп уақыт өткізетініңізді айттыңыз. Өз талғамыңыз бойынша Астанадағы үздік 3 мейрамхананы атай аласыз ба?

-Балаларымыз әлі кішкентай болғандықтан, кейінгі бірнеше жылда мейрамханаларға өте сирек барамыз, үй тамағын жақсы көреміз. Жұбайым тамақты дәмді пісіреді, сондықтан үйде ет асқанды ұнатамыз - көбінесе солай, - деді хоккейші.

- Үйде асылған ет мейрамханадағыдан дәмдірек пе?

- Үйдің тамағы, әрине, әлдеқайда жақсы, - деп атап өтті Диц.

Айта кетейік, Диц бірнеше жылдан бері Қазақстан ұлттық құрамасына шақырылмай жүр, бірақ ұзақ уақыт бойы лигада қазақстандық ретінде тіркелді. Қазір ойыншының ҚХЛ сайтындағы профилінде Канада азаматтығы көрсетілген.

"Барысқа" қарсы ойын Даррен үшін Құрлықтық хоккей лигасындағы 550-ші матч болды.