19 жастағы Санжар Ерұланұлы дзюдодан екі дүркін әлем чемпионы атанды

Фото: Халықаралық дзюдо федерациясы

19 жастағы дзюдошы Санжар Ерланұлы Ташкентте өткен жастар арасындағы әлем чемпионатында 100 келіге дейінгі салмақ дәрежесінде алтын медаль жеңіп алды, - деп хабарлайды Tengri Sport Туризм және спорт министрлігіне сілтеме жасап.

Финалда қазақстандық спортшы Жапония өкілі Шокей Хиранодан басым түсті. Оған дейін ол германиялық Даниил Спиридоновты, италиялық Франческо Маццонды, ширек финалда - әзербайжандық Давуд Намазлиді, ал жартылай финалда - испаниялық Никита Юдановты жеңді.

Ерланұлының алтыны Қазақстан құрамасы үшін 19–21 қараша аралығында өткен және 82 елден 594 спортшы қатысқан Ташкенттегі жастар біріншілігіндегі алғашқы жүлде болды.

Instagram-дағы бұл жарияланымды көру

International Judo Federation (@judogallery) жариялаған жазба

Санжар Ерланұлы жекелей сында жастар арасындағы әлем чемпионатында алтын иеленген тарихтағы үшінші қазақстандық дзюдошы атанды. Бұған дейін Елдос Сметов 2010 жылы, ал Мағжан Шамшадин 2015 жылы әлем чемпионы атанған болатын. Осылайша, қазақстандық дзюдошылар жастар арасындағы әлем біріншілігінің алтынын 11 жылдық үзілістен кейін қайта еншіледі.

Ерланұлы үшін бұл - екінші әлем чемпионы атағы. 2024 жылы Лимада ол 90 келіге дейінгі салмақта кадеттер арасындағы әлем біріншілігінің жеңімпазы атанды. Сонымен қатар, 2026 жылғы шілдеде қазақстандық спортшы жастар арасындағы Азия чемпионатында жеңіске жетті.

Әлеуметтік желілердегі парақшаларымызға жазылыңыз: Telegram және Instagram.

Бізге қосылыңыз және ең маңызды жаңалықтардан хабардар болыңыз!

Пікірлер