+7 (777) 001 44
99
UFC-дің жеңіл салмақтағы бұрынғы уақытша чемпионы Дастин Порье әуежайда мас күйде ұсталды. Желіде полицейдің камерасына түсіп қалған видео тарады, - деп хабарлайды Tengri Sport.
Бұған дейін, 21 маусымда UFC-дің бұрынғы жұлдызы, америкалық файтер Дастин Порье Атланта (Джорджия штаты, АҚШ) әуежайында мас күйде ұсталғаны туралы ақпарат пайда болған еді.
Енді интернетте экс-файтерді ұстау сәті түсірілген видео жарияланды. Кадрлардан оның полицеймен жанжалдасып, оны төбелесуге шақырғанын көруге болады. Алайда кейінірек ол сабасына түсіп, қарсылық көрсетпей, өзін ұстауға мүмкіндік берген.
Сондай-ақ ол полицейден кешірім сұрап, оның өз жұмысын өте жақсы атқарып жатқанын айтқан.
Dustin Poirier got kicked off his flight and tried to fight a cop before getting arrested pic.twitter.com/PL9ydmhjN5
- Happy Punch (@HappyPunch) June 23, 2026
Видео әлеуметтік желілерде тараған соң Дастин Порье өз парақшасында мәлімдеме жасады. Ол мансабын аяқтау оған ауыр тиіп жатқанын және ішімдік мұны одан әрі қиындатып жібергенін жазды.
"Мен көмекке мұқтаж болатын деңгейге жеттім. Жекпе-жектен кету маған оңай соғып жатқан жоқ, ал алкоголь бұл тығырықтан шығар жол емес. Ол әкемнің өмірін құртты, енді өз өмірімді құртуына жол бермеймін, менің отбасым менің жүз пайыз көңіл бөлгеніме лайық. Ойымды жинақтап, дұрыс қадамдар жасау үшін қолдан келгеннің бәрін істеп жатырмын", - деп жазды Дастин Порье әлеуметтік желіде.
Скриншот: instagram.com/dustinpoirier
Дастин Порье - UFC жұлдызы
Дастин Порье - UFC-дің жеңіл дивизион тарихындағы ең жарқын әрі құрметті файтерлердің бірі. Ол мансабын 2009 жылы бастап, аймақтық промоушендерден UFC-ге дейінгі жолдан өтті.
Порье өз мансабында UFC-дің жеңіл салмақтағы уақытша чемпионы атанды, көптеген тарихи жекпе-жектер өткізіп, ең мықты әрі ымырасыз файтерлердің бірі деген абыройға ие болды.
Порье жойқын соққысы, үздік грэпплингі және жеңіске деген ерен ерік-жігерімен танымал болды. Оның спорттық жолындағы ең жарқын сәттер - Конор Макгрегормен болған трилогия (Порье екі рет жеңіске жетті, оның ішінде 2021 жылы ирландиялықты нокаутқа түсірді), Хабиб Нурмагомедов, Джастин Гейджи, Макс Холлоуэй және Ислам Махачевпен болған жекпе-жектер.
Ол бірнеше рет "Кештің үздік жекпе-жегі" бонустарын иеленді (бұл көрсеткіш бойынша UFC тарихындағы көшбасшылардың бірі) және кез келген уақытта кез келген қарсыласпен жұдырықтасуға дайын екенін көрсетті.
"Порье эффектісі"
Оның техникасы мен жеңіске деген құштарлығы тіпті жеңілген жекпе-жектерінде де байқалады. Алайда Дастин Порье тіпті андердог болса да, чемпионға үлкен қиындықтар тудыра алатынын және кейде титулға өте жақын келетінін бірнеше рет дәлелдеді. Бірақ шешуші сәтте бірдеңе дұрыс болмай қала береді.
MMA жанкүйерлері бұл құбылысты "Порье эффектісі" деп атап кетті.
Бұған ең жарқын әрі ең өкінішті мысал - UFC 302 турниріндегі жеңіл салмақ чемпионы титулы үшін Ислам Махачевпен болған жекпе-жек.
Бұл бәсекеде Порье айқын андердог болды. Сарапшылардың көбі Махачев күрес пен бақылаудың арқасында басым түседі деп болжаған. Бірақ алғашқы 3 раундта америкалық көрермендердің бәрін таңғалдырды. Ол тік тұрып айқасуда Махачевті бірнеше рет есеңгіретіп, тейкдаундардан тамаша қорғанды және партерде мінсіз өнер көрсетті.
Бесінші раундқа қарай көпшілік Порьенің кезекті кереметті жасайтынына кәміл сенді. Бірақ дәл осы сәтте "Порье эффектісінің" классикалық финалы болды: шаршау, жарақаттан қан ағу, Махачевтің аяқтан шалуы және қылқындыру әдісінен кейін берілу.
Мансаптың соңы
Дастин Порье соңғы жекпе-жегін 2025 жылғы 19 шілдеде Жаңа Орлеанда (Луизиана штаты, АҚШ) өткен UFC 318 турнирінде өткізді. Оның қарсыласы танымал файтер Макс Холлоуэй болды, ал бәске BMF белбеуі тігілді.
Холлоуэйдің бастапқы қысымына қарамастан, Дастин мінез көрсетіп, тағы бір жойқын айқас ұйымдастырды. Қорытындысында Макс төрешілердің бірауыздан қабылдаған шешімімен жеңіске жетті, бірақ бұл жекпе-жек тарихта бір дәуірдің лайықты аяқталуы ретінде қалды.
Жеңілістен кейін 36 жастағы Порье мансабын ресми түрде аяқтайтынын жариялады. Кәсіби ММА-дағы 16 жыл ішінде ол нағыз жауынгерлік мұра қалдырды және өзінің әдемі хайлайттары мен тартысты жекпе-жектері үшін "Гауһар" ( Бриллиант) деген лақапатқа ие болды.
Instagram-дағы бұл жарияланымды көру
