+7 (777) 001 44
99
Бүгін Мексикада төрт жылдықтың басты футбол додасы – әлем чемпионаты басталады. Алайда турнир басталмай жатып, оның айналасында бірнеше дау туындап үлгерді. Tengri Sport олардың ең шулыларын назарларыңызға ұсынады.
Биыл футболдан әлем чемпионатын бірден үш ел: Мексика, Канада және АҚШ қабылдайды.
Дегенмен матчтер саны мен олардың мәртебесі бойынша негізгі алаң Штаттар болмақ – 104 ойынның 78-і, соның ішінде финалдық кездесу Америкада өтеді.
Сондықтан да турнир айналасындағы даулардың басым бөлігі АҚШ-қа қатысты болып отыр.
Қатысушы команда АҚШ-қа барудан бас тартып, матчтерді ауыстыруды сұрады
2026 жылдың ақпанында АҚШ пен Иран арасында зымырандар мен авиация қолданылған қақтығыс басталды. Бірнеше аптадан кейін Иран шенеуніктері құраманың турнирге қатыса алмайтыны туралы мәлімдеме жасады.
ФИФА бұл жағдайда бейтараптық танытты, бірақ ұйым үшін турнирге спорттық принцип бойынша жолдама алған барлық команданың қатысуы маңызды екенін атап өтті.
Ирандықтар футбол басшылығынан құрама қатысатын топтық кезеңдегі ойындарды АҚШ аумағынан басқа жерге ауыстыруды өтінді. Нәтижесінде команда Мексикада тұратын болды, бірақ матчтерін бәрібір Америкада өткізуге мәжбүр.
Бұл ретте АҚШ президенті Дональд Трамп турнирдегі ирандықтардың қауіпсіздігіне қатер төніп тұрғанын және елдің оны қамтамасыз ете алатынына сенімді емес екенін ашық мәлімдеді.
ӘЧ-2026 басталуына жақын қалғанда ирандық жанкүйерлердің де шектеулерге тап болғаны туралы хабарлар тарады – олардың көбіне елге кіруге тыйым салынды, ал федерацияға бөлінген билет квотасы қысқартылды.
Instagram-дағы бұл жарияланымды көру
Беделді құрамалар турнирге бойкот жариялауы мүмкін еді
Тағы бір даулы жағдай Трамптың Гренландия туралы мәлімдемелеріне байланысты өрбіді. АҚШ президенті аралды өз елінің құрамында көргісі келетінін бірнеше рет қадап айтқаннан кейін, БАҚ-та Германия тарапынан турнирге бойкот жариялануы мүмкін деген ақпарат пайда болды.
"Қауіп өте жоғары: төрт дүркін әлем чемпионы Германия (1954, 1974, 1990 және 2014) әлемдегі ең танымал ұлттық құрамалардың бірі және турнирдің спорттық әрі экономикалық табысының негізгі элементі болып саналады. Оның қатыспауы ФИФА мен ұйымдастырушы елдер үшін көп миллиондық шығын болар еді", - деп жазды Marca.
Британдық журналист Пирс Морган тариф мәселелері бойынша америкалық әкімшілікке қысым көрсету шарасы ретінде басқа еуропалық елдерді де бойкотқа қосылуға шақырды.
Дегенмен, соңында бойкот туралы әңгіме тек БАҚ беттерінде қалды және бірде-бір құрама турнирге қатысудан бас тартқан жоқ.
Африкалық төреші жарысқа жіберілмеді
Турнир басталуына бірнеше күн қалғанда тағы бір дау шықты. Сомалилік футбол арбитрі Омар Артан АҚШ аумағына кіруге рұқсат берілмегендіктен турнирге қатысудан шеттетілді.
Төреші Африка құрлығындағы үздіктердің бірі саналады, әрі оның дипломатиялық төлқұжаты болған, бірақ бұл көмектеспеді. ФИФА араша түсуге тырысқанымен, одан нәтиже шықпады – АҚШ өз заңдарын қатаң ұстанады.
ФИФА әлем чемпионатында төрелік етуге тағайындаған сомалилік төреші 🇸🇴 Омар Артанға Америка аумағына кіруге тыйым салынды
— Romain Molina (@Romain_Molina) 8 маусым, 2026 жыл
Виза алудағы қиындықтарды ескере отырып, оған Найробидегі Сомали елшілігі қолдау көрсетіп, мүмкіндік жасаған еді… pic.twitter.com/xdibnK3OZC
Америкаға кіреберістегі қатысушы команданы қатаң тексеру
Турнир қатысушыларының шекарашылар тарапынан қатаң тексеруге алынған кадрлары бүкіл әлемдегі футбол жанкүйерлерінің ашу-ызасын тудырды. Мәселен, турнир дебютанттары – Өзбекстан құрамасын иттермен тексерген.
Әлем чемпионатын өткізуді Америка Құрама Штаттарына сеніп тапсыру жақсы идея деп кім ойлады екен?
— HatsOff (@HatsOffff) June 9, 2026
Өзбекстан ұлттық футбол құрамасы келген бойда әдеттен тыс қатаң қауіпсіздік тексерісіне тап болды. pic.twitter.com/cZ7pT8KfiV
Осыған ұқсас кадрлар Сенегал құрамасын тексеру кезінде де пайда болды. Әлеуметтік желідегі жанкүйерлер бұны масқара мен қорлау деп атап жатыр.
Сенегалдық 🇸🇳 делегация АҚШ-қа келгенде осындай қарым-қатынасқа тап болды. Ұшу алаңындағы толық тінту, аяқ киімдерін шешкізу, сөмкелерін қылмыскерлердікіндей ақтарған.
— World Cup 2026 Daily (@TotalFootball) 8 маусым, 2026 жыл
Бұл нағыз қорлау мен масқара. Олар еуропалықтарды ешқашан мұндай сынақтан өткізбес еді.pic.twitter.com/KULjwTsCQI
Айта кетейік, Еуропа немесе Оңтүстік Американың үздік командаларымен мұндай жағдайлар әзірге болған жоқ.
ӘЧ-2026 фаворитінің базасынан небәрі бірнеше шақырым жердегі атыс
Көптеген құрама АҚШ-тағы өз базаларына алдын ала орналасты, бірақ бұл оларға жайлылық сезімін сыйламады.
Турнир фавориттерінің бірі – Англия құрамасының өз қауіпсіздігі үшін алаңдауына толық негіз бар.
"Полицияға Трост-авеню көшесіндегі атыс туралы хабарламалар түсті, бұл жер ағылшындар осы айда топтық кезеңде пайдаланатын жаттығу базасы мен командалық қонақ үйден небәрі төрт миль жерде орналасқан", - деп мәлімдейді The Sun.
Атыстан кейін тоғыз адам жараланып, ауруханаға түсті. Белгісіз қарулы адамдар әлі табылған жоқ.
Айта кетейік, дәл сол сәтте Англия құрамасының өзі базада болмаған – олар әзірге басқа штатта орналасқан. Дегенмен, күдіктілердің әлі де бостандықта жүргенін ескерсек, ойыншылар өздерін 100 пайыз жайлы сезіне қоюы екіталай.
Мексикада да тыныш емес: ӘЧ-ның ашылу матчына қауіп төніп тұр
11 маусымнан 12 маусымға қараған түні Мехикода мексикалықтар мен ОАР арасында турнирдің алғашқы матчі өтуі тиіс. Ойынға екі күн қалғанда стадион алдындағы алаңда наразылық шаралары басталды.
БАҚ-тың хабарлауынша, наразылық білдірушілер "Ацтека" стадионына кіреберісті жауып тастаған, бұл мундиальдың ашылу салтанатына дайындыққа кедергі келтіріп жатыр.
"Митингілер мен ереуілдерді білім беру қызметкерлері кәсіподағының өкілдері ұйымдастырды. Олар жалақыны көтеруді талап етіп жатыр", - деп хабарлайды Championat.
Thousands of protesters are blocking access to the stadium for the World Cup opening match in Mexico City😬
— The 44 ⚽️ (@The_Forty_Four) June 9, 2026
“Boycott the FIFA World Cup 2026” pic.twitter.com/qcm0QYZNs2
Әлем чемпионаттарындағы дау-дамайлар
Футболдан әлем чемпионаты сияқты ірі жарыстар даулы сәттерсіз сирек өтеді.
1930 жылғы ең алғашқы әлем чемпионатының өзі шулы болды. Бірнеше еуропалық құрама қаражаттың тапшылығына байланысты Уругвайдағы турнирге барудан бас тартты.
Келесі жолы уругвайлықтар кек алып, Италияға келмеді, ал төрт жылдан соң спорттық емес себептермен төрт бірдей құрама турнирден тыс қалды: уругвайлықтардың наразылығына аргентиналықтар қосылды, ал Испания мен Австрия соғыстың құрбаны болды.
Саясат кейінірек те командалардың турнирлерге қатысуына кедергі келтірді, бірақ басты дау-дамайлар тікелей матчтер кезінде болды.
Бәлкім, ең танымал эпизод – "Құдайдың қолы" - Диего Марадонаның 1986 жылғы әлем чемпионатының 1/4 финалында ағылшындардың қақпасына қолмен соққан голы. Сол жылы Аргентина әлем чемпионы атанды.
Еске сала кетейік, футболдан әлем чемпионаты 11 маусым мен 20 шілде аралығында өтеді. Егер турнир басталмай жатып осыншама шу шықса, матчтер кезінде бізді не күтіп тұр?
Мексика - ОАР арасындағы турнирдің ашылу матчінің тікелей трансляциясына сілтемені мына жерден таба аласыз.
