"Клубтың әлеуеті зор екенін көріп тұрмын"
50 жастағы швейцариялық маман команда Чемпионшипті сәтсіз бастағаннан кейін қызметінен босатылған Ники Хайеннің орнына келді. Енді Сәтпаев еуропалық чемпионаттарда табысқа жеткен бапкердің қол астында жаттығатын болады.
"Мен "Бернлиге" қарап, үлкен әлеует пен жанкүйерлердің мақсаттарына жетуге көмектесетін нағыз сапалы ойыншыларды көріп тұрмын.
Қандай жағдайда тұрғанымызды білемін және мұндай жағдаймен бұрын да бетпе-бет келгенмін. Біздің жанкүйерлер алғашқы ысқырықтан бастап өз күшіне сеніммен ойнайтын команданы көруге лайықты", - деп келтіреді Фабионың мәлімдемесін клубтың баспасөз қызметі.
Челестинидің "Бернли" тізгініндегі алғашқы матчі 31 қазанда өтеді - команда Чемпионшиптің кезекті турында "Портсмутты" қабылдайды.
Еске сала кетейік, Хайен қызметінен кеткеннен кейін БАҚ "Бернлидің" бас бапкерлігіне "Ливерпуль" аңызы Стивен Джеррардты келеді деп болжаған болатын.
Челестини деген кім?
Ойыншы ретінде Челестини жартылай қорғаушы позициясында өнер көрсетіп, Швейцария, Франция және Испания чемпионаттарында ойнап үлгерді. Оның жетістіктерінің қатарында 1998 және 1999 жылдары "Лозаннамен" бірге жеңіп алған екі Швейцария кубогі, француздық "Труамен" Интертото кубогіндегі жеңіс және Швейцария құрамасы сапында 2004 жылғы Еуропа чемпионатына қатысуы бар.
Челестини бапкерлік карьерасын 2011 жылы бастады. Алдымен ассистент болып жұмыс істеп, кейін командаларды өз бетінше басқарды.
Оның карьерасына қазақстандық "Тобыл" жанама әсер етті. 2023/2024 жылғы маусымдағы Конференция лигасының іріктеу кезеңінде қостанайлық клуб сырт алаңда швейцариялық "Базельді" 3:1 есебімен сенсациялық түрде жеңіп, турнирден шығарып жіберді. Осыдан кейін "Базельдің" бас бапкері Хайко Фогель көп ұзамай қызметінен кетіп, оның орнына Челестини келді.
Швейцариялық маманның басшылығымен "Базель" 2024/2025 маусымында Швейцария чемпионаты мен кубогін жеңіп алып, алтын дубль жасады. Содан кейін Челестини мәскеулік ЦСКА-ны басқарды.
Ресейде де маман жұмысын олжамен бастады - елдің Суперкубогін жеңіп алды, бірақ бір жылдан кейін қанағаттанарлықсыз нәтижелері үшін жұмыстан босатылды. 2026 жылдың мамырынан бастап ол жұмыссыз болған еді.
"Бернлидің" жаңа тәлімгері туралы тағы бір қызықты дерек - оның Че Гевара бейнеленген татуировкасы бар. Ол мұның мәнін былай түсіндірген:
"Матчтерді көргенде қақпаның артынан жиі Че Гевараның суретін көретінмін. Оның кім екені маған қызық болды. Ол туралы оқып, зерттей бастадым. Менің татуировкамда ол әскери беретсіз бейнеленген. Саясатқа ешқандай қатысы жоқ. Бірақ мені оның бойындағы өзіне еш қатысы жоқ адамдар үшін өмір бойы күрескені баурап алды, мен де өмірде көп күрестім, сондықтан оның суретін салдыруды ұйғардым", - деді ол Championat.com берген сұхбаттарының бірінде.
Сәтпаев "Бернлиде": голсыз өткен үш ай және құрамадан тыс қалу
Айта кетейік, "Бернлиге" "Челсиден" жалдау шартымен ауысқан қазақстандық 18 жастағы вингер жаңа командасында әзірге нәтижелі іс-әрекетімен көзге түсе қойған жоқ. Сәтпаевтың Чемпионшиптегі алты ойындағы басты жетістігі ретінде кездесудің үздік ойыншысы марапатын алуын айтуға болады, бірақ бұл 3 қыркүйекте болған еді.
Сонымен қатар қазақстандықты жарақаттар мазалай бастады, соның салдарынан ол Қазақстан құрамасының Ұлттар лигасындағы алғашқы матчтеріне қатыса алмады. Осыдан кейін ол "Бернли" сапында алаңға оралғанымен, турнирдің шешуші матчтеріне арналған ұлттық құраманың соңғы тізіміне тағы да енбей қалды.
Еске сала кетейік, Дастан Сәтпаевсыз Қазақстан құрамасы Ұлттар лигасының осы маусымында бірде-бір матчте жеңіске жете алмады.