26 жастағы бразилиялық футболшының пікірінше, Әлем чемпионатының 1/8 финалында норвегиялықтардан сенсациялық түрде жеңілу оған және команданың барлық ойыншысына қатты әсер еткен. Сондай-ақ ол маусым басындағы нашар ойынын демалысқа көбірек уақыт бөлгісі келгенімен байланыстырды.
"Әлем чемпионатынан кейін тиісті деңгейде дайындала алмадым деп есептеймін, өйткені жеңілістен алған соққы біз үшін, барлық бразилиялық үшін өте ауыр болды, солай емес пе? Мұндай ерте кезеңдегі жеңіліс біз үшін күтпеген жағдай болды, сондықтан мен өмірдің рақатын көру, демалу, сергу және отбасыммен көбірек уақыт өткізу үшін демалыс алдым. Нәтижесінде кейінгі жылдарға қарағанда аз жаттықтым, ал мұндай жоғары деңгейді ұзақ уақыт сақтап тұру қиын. Меніңше, Криштиану Роналду мен Месси ғана сонша жыл бойы бірдей көрсеткіштерді сақтай алды", - деді ол.
Бұл ретте форвард маусымның екінші жартысында жіберіп алған мүмкіндіктер орнын толтыруға ниетті екенін мәлімдеді.
"Мен адаммын, жиі қателесемін, бірақ әрдайым жетілуге, футболды терең түсінуге, күнделікті істерге қанығуға тырысамын. Дегенмен жасым 26-да, мен де өмірден ләззат алуым керек. Бұл маусымның басталуына әсер еткен болуы мүмкін. Сондай-ақ келісімшартты ұзарту мәселесі мен былтыр жазда менімен байланысқа шыққан клубтардың көптігі де көңіліме алаңдаушылық ұялатты.
Бірақ маусым өте ұзақ. Былтырғы маусымда желтоқсанға дейін небәрі бес гол соққан едім, кейін бұрынғы маусымдардағыдай 20-дан аса голмен аяқтадым. Мен қазір дайындалып, дамып жатырмын деп есептеймін, өйткені маусымның шешуші сәтінде мен әрқашан сақадай саймын", - деп атап өтті ол Бразилия құрамасының Сингапурмен ойын алдындағы баспасөз мәслихатында.
Еске сала кетейік, Винисиус Жуниор осы маусымда мадридтік "Реал" сапында барлық турнирде 12 ойынға қатысып, тек 1 гол соқты. Сондай-ақ оның еншісінде Аустралия мен Жапонияға қарсы жолдастық кездесулерде құрама сапында соққан үш голы бар.
Винисиус Жуниор дүйсенбіде (16-сы) өткен баспасөз мәслихатында Бразилия құрамасының әлем чемпионатынан кейінгі жолдастық кездесулерден түйген сабақтарына тоқталды. Ол қысым мен нәтиже қажеттілігін мойындай отырып, бапкерлер штабының құрамдағы жаңа ойыншыларды сынап көруінің маңыздылығын атап өтті: "(Жапонияға қарсы) ойында жеңіске жете алмағанымызға біраз реніш бар, бірақ біз көптеген жаңа ойыншылармен дайындық кезеңіндеміз. Бір-бірімізді танып жатырмыз; Жапония құрамында әлем чемпионатынан келген 15 немесе 16 ойыншы болса, бізде олай емес. Бұл жақсы сынақ болды және біз кездескен қарсыластардан үйреніп жатырмыз. Жас ойыншылар мұнда келіп, ойыннан ләззат алып, жауапкершілік жүгінсіз ойнауы керек. Мен екі әлем чемпионатына қатыстым, сондықтан тәжірибем мен әлемдегі үздік ойыншылардың бірі екенімді ескерсек, жауапкершіліктің негізгі бөлігі маған түсуі тиіс. Эндрик, Эстевао және басқа да жастар үйреніп, дамуы үшін мен бұл рөлді өз мойныма ала аламын, ал мен, Рафинья, Маркиньос, Магальяйнс және Бруно Гимарайнс сияқты ойыншылар алға шығып, жауапкершілікті көтеруіміз керек. Мен Карло Анчелоттиді әрқашан қатты құрметтеймін. Ол менің "Реал Мадридтегі" және футболдағы тарихымды өзгертті. Ол мені әрдайым қорғап, ең жақсы ақыл-кеңестерін беріп келеді. Оның ұлттық құрамаға келетінін естігенде қуандым, өйткені менің статистикалық көрсеткіштерім жақсаратынын білдім. Бұл оның қол астында соққан оныншы голым — бұған дейін тек алты гол соққан едім. Біз қателіктерді азайтып, қысқа уақыт ішінде бәрін ретке келтіруіміз керек; оның біз үшін ең үздік команда мен бразилиялық стильде ойнауға қолайлы тактика табатынына күмәнім жоқ".
— ꪜ𝕛𝕣⁷ ™🇧🇷 (@ViniJrTalk) 16 қараша, 2026 жыл
Винисиус Жуниор деген кім?
Мадридтік "Реалдың" 26 жастағы шабуылшысы клубқа 2018 жылы қосылып, содан бері әлемдегі ең қымбат әрі ең жоғары жалақы алатын футболшылардың біріне айналды.
Transfermarkt порталы оның құнын 130 миллион еуроға бағалайды - ол бұл көрсеткіш бойынша үздік ондыққа кіреді.
"Реалда" өткен 8 жыл ішінде Винисиус ФИФА-ның "Жыл ойыншысы" марапатын жеңіп алып, 2022/2023 жылғы маусымда Ла Лиганың үздік футболшысы деп танылды. Винисиуспен бірге команда екі рет Чемпиондар лигасын жеңіп алды, үш рет Испания чемпионы атанды және бір рет ел кубогін иеленді.
Бұл ретте Винисиус ұлттық құрамамен бірде-бір жүлде ұтып алған жоқ, кейінгі Әлем чемпионатында 1/8 финалда сәтсіздікке ұшырады.
Аңызға айналған Роналдиньо 11 жылдан кейін алғаш рет алаңға шықпақ
19 жастағы қазақстандық футболшы құрамадағы ең қымбат ойыншы атанды