Бразилия Әлем чемпионатындағы сәтсіздіктен кейін Анчелоттиге қатысты шешім қабылдады

Фото: thenews2.com/depositphotos.com

Бразилия құрамасының бапкері Карло Анчелотти команданың 2026 жылғы әлем чемпионатынан ерте шығып кеткеніне қарамастан, өз қызметінде қалады, деп хабарлайды Tengri Sport инсайдер Фабрицио Романоға сілтеме жасап.

Журналистің мәліметінше, Бразилия футбол федерациясы италиялық маманмен жұмысты жалғастыру туралы шешім қабылдаған.

"Анчелотти Әлем чемпионаты мен Америка кубогі қарсаңында Бразилия құрамасын қайта құру жұмыстарына жетекшілік етеді", - деп мәлімдеді Романо әлеуметтік желіде.

Айта кетейік, Карло Анчелоттидің бастауымен Бразилия құрамасы 2026 жылғы әлем чемпионатында өз тобында көш бастап, плей-офф кезеңіне шыққан болатын.

Бұдан кейін бес дүркін чемпиондар 1/16 финалда Жапония құрамасын жеңіп, бірақ 1/8 финалда Норвегияға жол берді.

1/8 финалда жарыс жолынан шығу - Бразилия құрамасының 1990 жылдан бергі әлем чемпионаттарындағы ең нашар нәтижесі. Сол жылы олар Аргентинадан 0:1 есебімен жеңілген еді.

Сол сәтсіздіктен кейінгі келесі әлем чемпионатында Бразилия құрамасы жеңімпаз атанып, одан кейінгі екі мундиальда да финалға шыққан болатын.

🚨🇧🇷 Карло Анчелотти мен Бразилия федерациясы келісімшартты құрметтеп, жұмысты бірге жалғастыруға уағдаласты.

Анчелотти Әлем чемпионаты мен Америка кубогы қарсаңында Селесаоны қайта құру ісін басқарады. pic.twitter.com/VP9MY564uF
— Fabrizio Romano (@FabrizioRomano) 8 шілде, 2026 жыл

Карло Анчелотти - Чемпиондар лигасының ең көп атақ иеленген бапкері

Еске сала кетейік, 67 жастағы италиялық маман Карло Анчелотти Бразилия құрамасын 2025 жылдың мамыр айында басқарған болатын. Оның жетекшілігімен команда 2026 жылғы әлем чемпионатының Оңтүстік Америкадағы іріктеу кезеңін бесінші орында аяқтады.

Бразилиялықтар - Анчелоттидің карьерасындағы алғашқы ұлттық құрама. Бұған дейін ол тек клубтарды жаттықтырып, үлкен жетістіктерге жеткен. Ол тарихта Чемпиондар лигасын бес рет жеңіп алған жалғыз бапкер: екі рет "Миланмен" және үш рет мадридтік "Реалмен".