Бұған дейін футболдан Әлем чемпионатын қай елдер жеңіп алған: толық тізімі

Әлем чемпионаты енді ғана басталғанда, Tengri Sport редакциясы біріншілік тарихындағы барлық жеңімпаз бен ең қызықты сәттер туралы баяндайды.

Кеше түнде Жер бетінің ең айтулы спорттық турнирлерінің бірі - футболдан әлем чемпионаты басталды.

ӘЧ-2026 ашылу матчінде үш ойыншы алаңнан қуылды

Бұл жай ғана ұлттық құрамалардың додасы емес, бүкіл әлем бойынша миллиардтаған жанкүйердің басын қосатын футбол әлеміндегі басты оқиға.

1930 жылдан бері турнир төрт жылда бір рет өткізіліп келеді және құштарлықтың, драма мен жоғары шеберліктің символына айналды.

2022 жылғы әлем чемпионатын кім жеңді?

Әлем чемпионатының кейінгі жеңімпазы - 2022 жылы Катарда өткен турнирде топ жарған Аргентина. Тарихтағы ең драмалық финалдардың бірінде аргентиналықтар негізгі және қосымша уақытта Франциямен 3:3 есебімен тең түсіп, пенальти сериясында 4:2 есебімен жеңіске жетті.

Лионель Месси финалда екі гол соғып, турнирдің үздік ойыншысы атанып, өзіне жетпей жүрген трофейді ақыры иеленді. Эмилиано Мартинес қақпада ерлік көрсетсе, Килиан Мбаппе хет-трик жасағанымен, француздарды жеңілістен құтқара алмады.

Футболдан барлық әлем чемпиондары

• 1930 Уругвай: Уругвай - Аргентина - 4:2;
• 1934 Италия: Италия - Чехословакия - 2:1;
• 1938 Франция: Италия - Венгрия - 4:2;
• 1950 Бразилия: Уругвай - Бразилия - 2:1;
• 1954 Швейцария: ГФР (Германия) - Венгрия - 3:2;
• 1958 Швеция: Бразилия - Швеция - 5:2;
• 1962 Чили: Бразилия - Чехословакия - 3:1;
• 1966 Англия: Англия - ГФР (Германия) - 4:2;
• 1970Мексика:Бразилия - Италия - 4:1;
• 1974 ГФР (Германия): ГФР (Германия) - Нидерланды - 2:1;
• 1978 Аргентина: Аргентина - Нидерланды - 3:1;
• 1982 Испания: Италия - ГФР (Германия) - 3:1;
• 1986Мексика:Аргентина - ГФР (Германия) - 3:2;
• 1990 Италия - ГФР (Германия) - Аргентина - 1:0;
• 1994 АҚШ: Бразилия - Италия - 0:0 (пенальти бойынша 3:2);
• 1998 Франция: Франция - Бразилия - 3:0;
• 2002 Жапония/Оңтүстік Корея: Бразилия - Германия - 2:0;
• 2006 Германия: Италия - Франция - 1:1 (пенальти бойынша 5:3);
• 2010ОАР: Испания - Нидерланды - 1:0;
• 2014 Бразилия: Германия - Аргентина - 1:0;
• 2018 Ресей: Франция - Хорватия - 4:2;
• 2022 Катар: Аргентина - Франция - 3:3 (пенальти бойынша 4:2).

Қай елдер Әлем чемпионатын неше рет жеңіп алды?

Бразилия - рекордтық 5 титул

Барлық әлем чемпионатына үзіліссіз қатысқан жалғыз құрама. Бұл - пентакампеондар, олар титулдарды 1958, 1962, 1970, 1994 және 2002 жылдары иеленді. Бразилиялықтар әлемге ең жарқын шабуылдаушы футбол мен аңыз ойыншылардың тұтас тізімін сыйлады: Пеле (17 жасында әлем чемпионы), Гарринча, Роналдо, Ривалдо, Роналдиньо және тағы басқалар.

Германия (ГФР-ды қоса алғанда) - 4 титул

Жеңістері 1954, 1974, 1990 және 2014 жылдары болды. Немістер - тұрақтылықтың, тәртіптің және шешуші сәттерде жеңіске жете білудің символы. 1954 жылғы "Берндегі ғажайып", 1974 жылғы Нидерландының "тотальды футболын" жеңуі және 2014 жылы Аргентинаға қарсы өткен драмалық финал - неміс футболының жарқын парағы.

Италия - 4 титул

Олар 1934, 1938, 1982 және 2006 жылдары әлем чемпионы атанды. Италиялықтар дәстүрлі түрде мінезімен, тактикасымен және "катеначчо" деп аталатын бұзылмас қорғаныс әдісімен мықты. Өкінішке қарай, бұл чемпионатқа Италия құрамасы қатыспайды.

Аргентина - 3 титул

Салтанатты жеңістері 1978, 1986 және 2022 жылдары болды. Екі жұлдыз тұтас дәуірлерді айқындайды: Диего Марадона (1986) және Лионель Месси (2022). Катардағы жеңіс ерекше әсерлі болды - Месси ақыры Әлем кубогін төбесіне көтерді.

Франция - 2 титул

Жеңістері 1998 және 2018 жылдары болды. Қазіргі Франция құрамасы - тарихтағы ең талантты командалардың бірі. 1998 жылғы өз үйіндегі турнирде Зинедин Зидан жарқыраса, 2018 жылы Мбаппе, Погба және Гризманн буыны топ жарды.

Уругвай - 2 титул

Олар 1930 жылы өз жерінде өткен тарихтағы алғашқы Әлем чемпионатының жеңімпазы атанса, келесі жеңісіне 1950 жылы қол жеткізді. 1950 жылы 200 мың көрерменнің көзінше Бразилияны жеңуі спорт тарихындағы ең ірі сенсациялардың бірі ретінде қалды.

Англия - 1 титул

Жалғыз жеңісі – 1966 жылғы өз алаңындағы турнир. ГФР (Германия) құрамасына қарсы өткен финал Джеффри Херстің хет-тригімен және даулы "ғасыр голымен" есте қалды.

Испания – 1 титул

Жеңіс. 2010 жылғы ОАР-дағы турнир. Висенте дель Боске баптаған "Қызыл фурия" тарихтағы ең үздік допқа иелік ету көрсеткішін паш етті. Хави, Иньеста, Алонсо мен Касильяс сол команданың символына айналды.

ӘЧ тарихындағы ең жарқын финалдар

Аргентина – Франция, 2022 (3:3, пенальти бойынша 4:2)

Көптеген маман мен жанкүйерлер бұл матчті футбол тарихындағы ең үздік финал деп атайды. Лионель Месси екі гол соғып, нәтижелі пас беріп, ақыры басты трофейді жеңіп алды. Килиан Мбаппе бұған хет-трикпен жауап берді – бұл 1966 жылдан бергі ӘЧ финалындағы алғашқы хет-трик. Матч драмаға толы болды: екі таймның да қосымша уақытындағы голдар, қақпашылардың керемет сейвтері және эпикалық пенальти сериясы.

Бразилия – Уругвай, 1950 (1:2)

Бұл матч – спорт тарихындағы ең ірі сенсациялардың бірі. Өз алаңында 200 мыңға жуық көрерменнің алдында ойнаған Бразилия айқын фаворит саналды. Екінші таймда Альсидес Гиджидің дәл соққысы бүкіл елді есеңгіретіп, Уругвайға жеңіс сыйлады. Бұл матч бразилиялықтар үшін әлі күнге дейін ұлттық трагедия болып қала береді.

ГФР (Германия) – Венгрия, 1954 (3:2)

"Берндегі ғажайып". Ференц Пушкаш бастаған, жеңілмейтін деп есептелген Венгрия құрамасы 8-минутқа қарай 2:0 есебімен алда тұрды. Алайда Зепп Гербергердің шәкірттері керемет камбэк жасады. Хельмут Ран мен Макс Морлоктың голдары матч тағдырын шешті. Бұл жеңіс соғыстан кейінгі Германияның қайта түлеуінің символына айналды.

Англия – ГФР (Германия), 1966 (қосымша уақытта 4:2)

Англияның өз алаңында өткен турнирдегі алғашқы әрі әзірге жалғыз жеңісі. Джеффри Херстің хет-тригі тарихқа енді, әсіресе оның үшінші голы бойынша желіде әлі күнге дейін қызу пікірталас жүріп жатады. "Уэмблидегі" финал ағылшындар үшін нағыз мереке болды.

Бразилия – Италия, 1970 (4:1)

Пеле бастаған Бразилия әлем чемпионаттары тарихындағы ең әдемі футболды көрсеткен болуы мүмкін. Пеле, Жаирзиньо, Жерсон және Карлос Албертоның голдары (соңғысы әйгілі "ғасыр голы") финалды шабуылдаушы футболдың мерекесіне айналдырды. Бұл бүкіл әлемге түрлі-түсті форматта көрсетілген алғашқы финал болды.

Әлем чемпионатының рекордтары

ӘЧ тарихындағы үздік сұрмергендер

• Мирослав Клозе (Германия) - 16 гол (рекорд). Қатарынан төрт турнирде (2002–2014) гол соққан.
• Роналдо (Бразилия) – 15 гол.
• Герд Мюллер (ГФР) – 14 гол.
• Лионель Месси (Аргентина) және Жюст Фонтен (Франция) – 13 голдан. Фонтен әлі күнге дейін бір турнирде соғылған голдар саны бойынша рекордты ұстап тұр – 1958 жылы 13 гол соққан.

Ең ірі жеңістер мен нәтижелілік

• Ең нәтижелі матч: Австрия – Швейцария 7:5 (1954 жыл, ширек финал) – бір ойында 12 гол.
• Финалдағы ең ірі есеп: Бразилия – Швеция 5:2 (1958).

Рекордтық сериялар мен жетістіктер

• Ең ұзақ жеңісті серия: Бразилия – қатарынан 11 жеңіс (2002 жылдан 2006 жылға дейін).
• Қатысу саны бойынша рекорд: Бразилия барлық 22 әлем чемпионатына қатысқан жалғыз ел.
• Ең жылдам гол: Хакан Шүкір (Түркия) – 11 секунд (2002).
• Ойыншылар арасындағы ең көп матч: Лионель Месси (Аргентина) – 26 матч (2006, 2010, 2014, 2018, 2022).
• Титулын қорғап қалған командалар: Италия (1934–1938) және Бразилия (1958–1962).

ӘЧ-2026-да кім фаворит?

Испания құрамасы турнирдің басты фавориті саналады. Еуропаның қазіргі чемпиондары мундиальға тамаша бабында, үздік құраммен және Еуропа чемпионатында жеңіске жетелеген өзіндік шабуыл стилімен келе жатыр.

Сарапшылар мен талдаушылар "қызыл фурияны" титулдан басты үміткер деп атайды. Одан кейінгі негізгі фавориттер тізімінде дәстүрлі түрде Франция, Англия, Аргентина және Бразилия орналасқан.

ӘЧ-2026: қайда және қашан өтеді?

Футболдан 2026 жылғы әлем чемпионаты АҚШ, Мексика және Канадада 11 маусым мен 19 шілде аралығында өтеді.

Әлем чемпионаты-2026: турнир басталмай жатып дау-дамай көбейді