“Ешкім футболды сатпайды“: ФИФА Әлем чемпионатына жасалған бойкоттан кейін өз ұстанымын түсіндірді

Бұған дейін ФИФА-ның FIFA Forward Enterprise (FFE) еншілес компаниясын құруға ниетті екені белгілі болған еді. Ол әлем чемпионаты мен клубтық әлем чемпионатын басқаратын болады. Бұл компанияның 20 пайызға дейінгі үлесін жеке инвесторларға сату жоспарланған.

Көптеген футбол қауымдастықтары мен конфедерациялары, соның ішінде УЕФА мен КОНКАКАФ, FFE құрылуына байланысты теріс пікір білдірді..

Сондай-ақ УЕФА өкілдері егер әлем чемпионатының меншік құқығы еншілес ұйымға берілсе, ұйымның барлық 55 мүшесі ФИФА аясындағы жарыстарға қатысудан бас тартатынын мәлімдеді.

ФИФА-ның ұстанымы

ФИФА FFE-ні құру туралы ұсынысқа байланысты сын мен бойкот қаупіне жауап қатты. Ресми түсініктемеде ұйым футболдың сатылатыны туралы сөз болып отырмағанын баса айтып, барлық 211 мүше қауымдастықпен ашық кеңесулерді жалғастыруға дайын екенін растады.

"Біз жария түрде айтылған пікірлер мен алаңдаушылықтарды құрметтейміз және ашық әрі демократиялық кеңесу процесіне адалдығымызды растаймыз. Біз жоспарлаған кеңесу процесіне БАҚ-тағы бұрмаланған хабарламалар кедергі келтірді. Әрбір мүше қауымдастықтың (МА) дауыс беру кезінде нақты фактілерге сүйене отырып, өз ұстанымын білдіруіне кепілдік беру үшін біз бұл кеңесу процесін жалғастырамыз", - деп жазды ФИФА-ның баспасөз қызметі.

Ұйым өкілдерінің айтуынша, FFE туралы ұсыныс барлық мүше қауымдастыққа өз елдеріндегі футболдың коммерциялық мүмкіндіктеріне иелік етуге айтарлықтай қатысу мүмкіндігін беру үшін ғана жасалған. Бұл ретте ФИФА-ның басқару құрылымы мен футболдың рухына ешқандай нұқсан келмеуі тиіс.

"Футболды ешкім сатпайды. Бұл ФИФА-ның тіпті ойына да кіріп-шықпаған нәрсе", - деп толықтырды федерация өкілдері.

ФИФА-дағылар әркімнің келіспеушілік білдіруге және қосымша түсініктеме талап етуге құқығы бар екенін атап өтті. Алайда, бірде-бір жекелеген ұйым бүкіл әлем бойынша барлық 211 мүше қауымдастықтың атынан сөйлей алмайды.

Ұсынысқа сәйкес, ФИФА-ның коммерциялық қызметі мен іс-шараларды өткізу жөніндегі операциялық жұмысы еншілес ұйымға беріледі, оған ФИФА-ның өзі тұрақты түрде иелік етеді және басқарады.

Құрылатын коммерциялық құн барлық 211 мүше қауымдастық арасында бөлінеді, бұл олардың әрқайсысына өз елінде футболды дамытуға қомақты инвестиция салуға мүмкіндік береді.

Сонымен қатар әр қауымдастық FIFA Forward даму бағдарламасы аясында 2027–2030 жылдар кезеңіне 20 миллион доллар алады - бұл олардың ұсынысты қолдайтынына немесе қолдамайтынына байланысты емес. ФИФА түсіндіруінше, бұл ұлғайтылған қаржыландыру FFE-нің коммерциялық операцияларды тиімдірек басқаруы арқылы түсетін қосымша табыстар есебінен қалыптасады.

Бөлек түрде FIFA Fast Forward бағдарламасы қарастырылған — бұл әр қауымдастыққа тағы 20 миллион доллар мөлшерінде біржолғы қосымша даму қаржысын бөлу. Оған қатысу толығымен ерікті болады және сыртқы инвестициялар есебінен қаржыландырылады.

ФИФА: мүше қауымдастықтардың көпшілігінің қолдауынсыз ұйымның коммерциялық қызметі өзгеріссіз қалады және FFE құрылмайды деп қадап айтты.

Әлем чемпионатын алда не күтіп тұр?

Тіпті УЕФА-ның барлық елі қарсы шықса да, ФИФА-ға әлем бойынша 211 мүше қауымдастықтың көпшілігінің қолдауы жеткілікті. Дегенмен, еуропалықтардың жаппай бойкоты турнир үшін күрделі мәселелер тудыруы мүмкін, өйткені ең мықты құрамалар, клубтар мен жанкүйерлер дәл осы Еуропада шоғырланған.

2022–2026 жылдардағы әлем чемпионатының циклі ФИФА-ға 15 миллиард доллардан астам табыс әкелді. Ұйым турнирді 64 командаға дейін кеңейту мүмкіндігі арқылы табысты одан әрі арттыруды жоспарлап отыр. Жаңа коммерциялық құрылым әлем чемпионатын төрт жылда бір реттен жиі өткізу туралы қысымға әкелуі мүмкін деген қауіптер бар.

Келесі әлем чемпионаты 2030 жылы Испания, Португалия және Мароккода (жекелеген матчтер Аргентина, Уругвай және Парагвайда) өтеді. Әйелдер арасындағы мундиаль 2027 жылы Бразилияда ұйымдастырылады.

Қазақстан футболдан әлем чемпионатына жасалған бойкотқа қосылды