+7 (777) 001 44
99
Халықаралық футбол федерациясы, яғни ФИФА Иран құрамасына 2026 жылғы әлем чемпионаты кезінде жаттығу базасын Мексикаға ауыстыруға рұқсат берді, деп хабарлайды Tengri Sport.
Бастапқы жоспар бойынша Иран құрамасы АҚШ-тың Аризона штатында орналасуы керек болған. Алайда енді команда Мексиканың Тихуана қаласындағы лагерьге тұрақтайды.
"ФИФА өкілдерімен және әлем чемпионатының ресми тұлғаларымен өткен кездесулерден, сондай-ақ біздің өтініштерімізден кейін команда базасын АҚШ-тан Мексикаға көшіру туралы сұрауымыз мақұлданды. Біз Тынық мұхитына жақын, Мексика мен АҚШ шекарасында орналасқан Тихуанадағы лагерьде боламыз", — деді Иран футбол федерациясының президенті Мехди Тадж.
Бұған дейін Иран билігі АҚШ-пен арадағы қарулы қақтығысқа байланысты іріктеу кезеңі арқылы жолдама алған ұлттық құраманың әлем чемпионатына қатысуына бойкот жариялауы мүмкін екенін мәлімдеген еді.
Былтыр жыл соңында өткен жеребе қорытындысы бойынша Иран топтық кезеңдегі барлық матчын АҚШ аумағында өткізуге тиіс болған. Команда екі ойынды Калифорнияда, бір кездесуді Сиэтлде өткізеді деп жоспарланған.
Instagram-дағы бұл жарияланымды көру
Кейін Иран ФИФА-мен матчтарды АҚШ-тан Мексикаға ауыстыру жөнінде келіссөз жүргізді. Алайда мундиальды қабылдайтын елдердің бірі — Мексика президенті Клаудия Шейнбаум бұл мәселе бойынша нақты шешім қабылданбағанын айтқан болатын.
Егер Иран құрамасы жарысқа қатысудан бас тартса, командаға жарты миллион доллардан астам айыппұл салынып, федерацияның мүшелігі тоқтатылуы мүмкін еді.
Иран құрамасының турнирге ресми түрде қатысатыны туралы ФИФА президенті Джанни Инфантино 30 сәуірде мәлімдеді.
Instagram-дағы бұл жарияланымды көру
2026 жылғы футболдан әлем чемпионаты 11 маусым мен 19 шілде аралығында АҚШ, Канада және Мексикада өтеді.
Иран құрамасы G тобына түсті. Бұл топта олар Жаңа Зеландиямен 16 маусымда, Бельгиямен 22 маусымда, Мысырмен 27 маусымда кездеседі.
Бұған дейін АҚШ-тағы пиццериялардың бірі әлем чемпионатына орай ерекше акция жариялаған еді. Компания АҚШ құрамасының кез келген ойыншысы қызыл қағаз алса, клиенттерге ондаған мың пицца тарататынын мәлімдеген.
Сондай-ақ Бразилия құрамасы мен «Сантос» клубының жұлдызы Неймар Жуниор әлем чемпионатына қатысатын ойыншылар тізіміне енгеннен кейін жарақат алып қалғаны хабарланған болатын. Ал Конго Демократиялық Республикасының құрамасына қатысты жағдай ел аумағында Эбола вирусының таралуына байланысты назарға іліккен.
