ФИФА басшысы “футболды сату“ жанжалынан кейін кешірім сұрады

Инфантино Цюрихте (Швейцария) өткен ФИФА кеңесінің отырысы кезінде футбол қауымдастығына үндеу жасады.

"Ең алдымен, FIFA Forward Enterprise жобасы бойынша ақпараттандыру және кеңес беру процесінде жіберілген қателіктеріміз үшін кешірім сұраймын, бұл кейіннен көптеген салдарға әкеп соқты. Бірақ бұл тек ұсыныс болғанын, түпкілікті қабылданған шешім емес екенін есте ұстау маңызды. Тек қана ұсыныс. Оның жалғыз мақсаты - 2026 жылғы әлем чемпионаты кезінде бүкіл дүние жүзіндегі адамдарды шабыттандырған оқиғалар сияқты табысты жобалардың санын арттыру еді. Өйткені футбол баршаға ортақ", - деді ол.

Сонымен қатар іс-шараға қатысқан БАҚ өкілдері оның сұрақтарға жауап беруден бас тартқанын және жанжалға кінәлілерді жазалау туралы мәлімдеме жасамағанын алға тартты.

УЕФА ФИФА-ға қарсы: қақтығыстың мәні неде?

Еске сала кетейік, БАҚ мәліметінше, ФИФА әлем чемпионаты мен клубтық әлем чемпионатын басқаратын FIFA Forward Enterprise еншілес компаниясын құруға ниетті болған.

Жарыс мәселелерін ФИФА басқаруы тиіс еді, бірақ компанияның 20 пайызға дейінгі үлесін жеке инвесторларға беру ұсынылған болатын.

Бұл мәміле ұйымға 4 миллиард доллардан астам табыс, ал ФИФА президенті Джанни Инфантиноға жеке бонустар әкеледі деп күтілген.

УЕФА мен басқа да құрлықтық футбол бірлестіктері ФИФА-ның бұл әрекетін футболды коммерцияландыру деп есептеді.

Инфантиноның жүзеге аспаған жобасын Еуропа, Солтүстік және Орталық Америка және Азия футбол конфедерациялары айыптады. Сонымен қатар олар Инфантиноның ұсынысы мақұлданған жағдайда әлем чемпионатына бойкот жариялайтындарын айтып, сес көрсетті.

Құрлықтық федерациялардың (ең алдымен УЕФА-ның) сынынан кейін жоба уақытша тоқтатылды. Алайда УЕФА тергеу жүргізуді және кінәлілерді жазалауды талап етіп отыр.

Қазақстан бойкотқа қосылып, "футболды саудалауға" қарсы шықты

Айта кетейік, УЕФА жариялаған бойкотқа ұйымның барлық мүшесі, соның ішінде Қазақстан футбол федерациясы да қатысты. ҚФФ біздің сауалымызға берген жауабында Еуропа футбол одағының ұстанымын неге қолдағандарын егжей-тегжейлі түсіндіріп берді.

"Қазақстан футбол федерациясы ФИФА-ның әлем чемпионатын басқаратын коммерциялық құрылымға жеке инвесторларды тарту туралы ұсынысына қатысты УЕФА мен барлық 55 еуропалық федерацияның бірауыздан қабылдаған ортақ ұстанымын толық қолдайды. Бұл бүкіл футбол қауымдастығы үшін принципті мәселе: әлем чемпионаты ойыншылардың, құрамалар мен жанкүйерлердің бірнеше буынының еңбегімен қалыптасты және оны инвестициялық өнім ретінде қарастыруға болмайды", - деп атап өтті ҚФФ.

Қазақстан футбол федерациясы әлем чемпионатына жасалған бойкотқа пікір білдірді

Бұған дейін футболдан Қазақстан құрамасының қақпашысы Стас Покатилов SofaScore порталының нұсқасы бойынша Чемпиондар лигасында аптаның үздік ойыншыларының қатарына енген болатын. Оның көрсеткіші Ламин Ямаль мен Харри Кейннен жоғары болды.