ФИФА-ның бұрынғы басшысы даудан кейін президент лауазымын әйелге беруді ұсынды

Фото: depositphotos.com//instagram.com/liseklaveness/

Халықаралық футбол федерациясының (ФИФА) бұрынғы президенті Йозеф Блаттер ұйымның жаңа басшысы лауазымына норвегиялық Лисе Клавенесстің кандидатурасын ұсынды, деп хабарлайды Tengri Sport функционердің әлеуметтік желідегі парақшасына сілтеме жасап.

1998-2015 жылдар аралығында ФИФА-ны басқарған Блаттердің айтуынша, ұйымда өзгерістер уақыты келді және Клавенесс сол жаңашылдықтың бастауы бола алады.

"Лисе Клавенесс зор құрметке лайық. Ол әрдайым нақты ұстанымын білдіріп, көпшіліктің соңынан ермейтін жалғыз адам болды. Ал ФИФА-да басшылық тізгінін әйел ұстайтын уақыт жетті", - деді ол.

Айта кетейік, 1904 жылдан бері ФИФА-ны 10 президент басқарған, бірақ олардың арасында бірде-бір әйел болған жоқ.

Лисе Клавенесс деген кім?

45 жастағы норвегиялық маман - бұрынғы футболшы, 2022 жылы Норвегия футбол федерациясын басқарды.

БАҚ мәліметінше, Әлем чемпионаты кезінде АҚШ құрамасының ойыншысы Балогунның дисквалификациясын алып тастауға байланысты дау туындағанда, ФИФА-ның Әдеп комитетіне ресми шағым түсіру бастамасын осы Клавенесс көтерген. Сондай-ақ ол алдыңғы мундиалды өткізетін ел ретінде Қатардың таңдалуына қарсы шыққан болатын.

Клавенесстің басшылығы кезінде норвег футболы үлкен жетістіктерге жетті: өткен маусымда "Буде-Глимт" Чемпиондар лигасының 1/8 финалына дейін барса, Норвегия құрамасы Әлем чемпионатының 1/4 финалына дейін жетті.

ФИФА-дағы дау: не болды?

Еске салсақ, өткен аптада ФИФА-ның әлем чемпионаттарының коммерциялық жағын өзгертуге мүмкіндік беретін жеке компания құру жоспары туралы белгілі болған еді.

"Қазақстан футбол федерациясы УЕФА мен барлық 55 еуропалық федерацияның ФИФА-ның Әлем чемпионатын басқаратын коммерциялық құрылымға жеке инвесторларды тарту туралы ұсынысына қатысты біртұтас ұстанымын толық қолдайды.

Бұл бүкіл футбол қауымдастығы үшін принципті мәселе: Әлем чемпионаты ойыншылардың, құрамалардың және жанкүйерлердің бірнеше буынының еңбегімен құрылған, сондықтан оны тек инвестициялық өнім ретінде қарастыруға болмайды", - деп Tengri Sport-қа дауға қатысты ұстанымын білдірді.

Бұған УЕФА және басқа да құрлықтық федерациялар қарсы шықты, содан кейін ФИФА жоспарынан бас тартты.

Жағдай шешілгеніне қарамастан, УЕФА ФИФА басшылығына сенімсіздік білдірді, бұл ұйымның қазіргі басшысы Джанни Инфантиноның қайта сайлану мүмкіндігіне айтарлықтай әсер етеді. Сайлау 2027 жылдың наурызында өтеді.

Қазақстан футбол федерациясы әлем чемпионатына жасалған бойкотқа пікір білдірді