Франция - Марокко матчінде Әлем чемпионаты 1/2 финалының алғашқы қатысушысы анықталды

Фото: henews2.com/depositphotos.com

10 шілде күні түнде Франция құрамасы 2026 жылғы әлем чемпионатының 1/4 финалында Марокко командасын жеңді, деп хабарлайды Tengri Sport.

Еске сала кетейік, ширек финалға барар жолда француздар алдымен Швецияны (3:0) тас-талқан етіп, кейін Парагвайдан (1:0) басым түскен болатын.

Марокколықтарға келер болсақ, олар пенальти сериясында Нидерландыдан (1:1, пенальти бойынша 3:2) өтіп, Канаданы (3:0) айқын басымдықпен жеңді.

Ойын барысы

25-минутта француздар өз алаңында допты тартып алып, қарсы шабуылға шықты. Килиан Мбаппе айып алаңына кірген сәтте Марокко қорғаушысы Нуссаир Мазрауи ереже бұзды. Төреші пенальти белгіледі.

Бірнеше минуттан кейін соққыны Мбаппе өзі орындады. Форвард оң бұрышқа тепкенімен, Марокко қақпашысы Яссин Буну доптың бағытын аңдап, соққыны қайтара білді.

Instagram-дағы бұл жарияланымды көру

433 (@433) жарияланымы

Жалпы алғанда, бірінші таймда Франция басымдыққа ие болды. Допқа иелік ету көрсеткіші тең болғанына қарамастан (Марокко пайдасына 51-ге 49), француздар қарсылас қақпасына 13 соққы бағыттады (3-і нысанаға дөп тиді). Сондай-ақ күтілетін голдар моделі (xG) бойынша 1,87 голға лайықты ойын көрсетіп, 3 айқын гол соғатын мүмкіндік жасады.

Есеп екінші таймда ашылды. 60-минутта Килиан Мбаппе допты қабылдап алып, айып алаңының ішінен тамаша соққымен оны марокколықтар қақпасының оң жақ жоғарғы бұрышына бағыттады.

Осылайша, форвард турнирдің үздік сұрмергендері додасында Лионель Мессимен теңесті, қазір екеуінің еншісінде 8 голдан бар.

Instagram-дағы бұл жарияланымды көру

433 (@433) жарияланымы

Ал 66-минутта француздар есепті еселеді. Усман Дембеле алаң ортасында допты алып, айып алаңының сызығына дейін жетті де, жақын бұрышқа соққы жасады. Доп Марокко құрамасы қақпашысының қолының астынан өтіп, торға түсті.