Еуропа елдері футболдан ӘЧ-ге бойкот жарияламақ: себебі белгілі

Бұған дейін ФИФА FIFA Forward Enterprise еншілес компаниясын құруға ниетті екені белгілі болған. Ол Әлем чемпионатын және клубтар арасындағы Әлем чемпионатын басқарады. Бұл компанияның 20 пайызына дейін жеке инвесторларға сату жоспарланып отыр.

Мәміле ұйымға 4 миллиард доллардан астам қаражат әкелуі мүмкін. ФИФА президенті Джанни Инфантино сәттілік болған жағдайда қомақты бонустар иеленуі ықтимал.

2031 жылы өкілеттік мерзімі аяқталғаннан кейін ол жаңа компанияның басшысы болып тағайындалып, ондаған миллион жалақы алуы да мүмкін.

БАҚ мәліметінше, үлесті сатып алуға басты үміткер - Thrive Capital инвестициялық қоры. Оны Дональд Трамптың күйеу баласы Джаред Кушнердің інісі Джошуа Кушнер басқарады.

УЕФА-ның қатаң реакциясы

УЕФА шұғыл мәлімдеме жасап, ФИФА футбол иесі емес екенін және оны сатуға құқығы жоқ екенін айтты.

"Бұл футболды басқару органдары ешқашан аттамауы тиіс шектен шығу. УЕФА бұған өте байыппен қарайды. Ұлттық футбол қауымдастықтарының барлығы осылай қабылдауы тиіс. Барлық мүдделі тарап: лигалар, клубтар, ойыншылар, жанкүйерлер, үкіметтер және ойынның болашағына бей-жай қарамайтындардың бәрі солай әрекет етуі керек.
Футболдың жаны мен басқаруы, әсіресе қаржылық пайданы кім көретіні туралы ашықтық жоқ кезде, сауда нысаны емес. Біздің ешқайсымыз футбол иесі емеспіз. Бұл ФИФА-ның сатуға болатын меншігі емес", - деп мәлімдеді УЕФА.

Sky News ақпараты бойынша, УЕФА елдері Әлем чемпионатына толық бойкот жариялау мәселесін талқылауға дайын.

Өзге қауымдастықтар ұстанымы

Солтүстік және Орталық Америка футбол конфедерациясы (КОНКАКАФ) да алаңдаушылық білдірді. Мәлімдемеде жоспар туралы ресми рәсімдер арқылы емес, БАҚ-тан белгілі болғаны баса айтылған.

"Футбол көшбасшылары ретінде біз ойынның сақтаушысымыз. Әрбір шешім тиімді басқару, сенімді процестер мен ұзақ мерзімді қамқорлық принциптеріне негізделуі тиіс", - деді КОНКАКАФ өкілдері.

Англия футбол қауымдастығы бұл ұсыныстан мүлдем бейхабар болғанын және ешқандай нақты мәлімет алмағанын мәлімдеді.

"Процестің және басқарудың жоқтығына, сондай-ақ ұсыныстың негізі мен принциптеріне алаңдаймыз. Ұсыныс ашық жасалған кезде біз өз ұстанымымызды білдіреміз", - деп жазды Англия қауымдастығының баспасөз қызметі.

Инфантино жауабы

ФИФА президенті жаңа формат ұлттық қауымдастықтарды қаржыландыруды ұлғайтуға мүмкіндік беретінін алға тартып отыр. Оның айтуынша, 2027 жылдан 2030 жылға дейін әр қауымдастық қазіргі 8 миллионның орнына 20 миллион долларға үміткер бола алады.

"Бұл бүкіл әлемдегі футболды демократияландыруға қатысты. Әрбір қауымдастық өз болашағын өз бетінше қалыптастыруға мүмкіндік алуы тиіс", - деді Инфантино.

Сондай-ақ Джанни Инфантино мүше қауымдастықтарға ФИФА үлесін жаңа еншілес компания арқылы сату жоспары бойынша дауыс беру үшін 53 күндік мерзім белгіледі.

Ол ФИФА-ға мүше 211 елдің әрқайсысына, егер олар оның жаңа келісіміне қол қойса, 40 миллион доллар көлемінде біржолғы төлем жасауды ұсынды.

Әлем чемпионатын алда не күтіп тұр?

УЕФА-дағы барлық ел қарсы шықса да, ФИФА-ға әлем бойынша 211 мүше қауымдастық көпшілігінің қолдауы жеткілікті. Дегенмен, еуропалықтардың жаппай бойкоты турнир үшін күрделі мәселелер тудыруы мүмкін, өйткені ең мықты құрамалар, клубтар мен жанкүйерлер Еуропада шоғырланған.

2022–2026 жылдардағы Әлем чемпионатының циклі ФИФА-ға 15 миллиард доллардан астам табыс әкелді. Ұйым турнирді 64 командаға дейін кеңейту мүмкіндігі арқылы кірісті одан әрі арттыруды жоспарлап отыр. Жаңа коммерциялық құрылым Әлем чемпионатын төрт жылда бір реттен жиі өткізуге қысым жасауы мүмкін деген қауіп бар.

Келесі Әлем чемпионаты 2030 жылы Испания, Португалия және Мароккода (жекелеген матчтер Аргентина, Уругвай және Парагвайда) өтеді. Әйелдер арасындағы мундиаль 2027 жылы Бразилияда ұйымдастырылады.

Аргентина президенті ӘЧ-2026 кезінде құрамаға қарсы астыртын әрекет жасалғанын айтты

Еске сала кетейік, бұған дейін Халықаралық футбол қауымдастығының (ФИФА) президенті Джанни Инфантино 2026 жылғы Әлем чемпионатының хейтерлеріне үндеу жасады.