Хабиб өтініш жасаған: Усман Нурмагомедов Абу-Дабидегі түрмеден босатылды

Фото: nstagram.com/usman_nurmagomedov/ видеодан кадр

Усман Нурмагомедов пен грузиялық ММА файтері Мераб Двалишвилимен төбелеске қатысқан басқа да тұлғаларды босату шарттары белгілі болды, деп хабарлайды Tengri Sport Абу-Даби сотының баспасөз қызметіне сілтеме жасап.

Сот мәліметінше, Усман мен Умар Нурмагомедовтер, сондай-ақ олардың командасы алты айлық қамау жазасы көпмиллиондық айыппұлға ауыстырылған соң күзетпен ұстаудан босатылды.

"Қылмыстық сот өзара кикілжіңнен кейін қонақүйде жаппай төбелес ұйымдастырып, оны видеоға түсіріп, қоғамдық тәртіпті бұзған сегіз айыпталушыға қатысты үкімді жеңілдетті.

Қайта қаралған жаза бойынша, тараптардың татуласуына және өзара шағымдардан бас тартуына, сондай-ақ жәбірленушінің Абу-Даби үкіметіне оларды босату туралы өтініш білдіруіне байланысты әр айыпталушыға 150 мың дирхам (шамамен 18 миллион теңге) көлемінде айыппұл салынды", - делінген мәлімдемеде.

Еске сала кетейік, бұған дейін зардап шеккен Мераб Двалишвили ағайынды Нурмагомедовтерді қамаудан босату туралы үндеу жасаған болатын. Кейін БАҚ-та ағайындыларды босату туралы келіссөз жүргізу үшін Біріккен Араб Әмірліктеріне аңызға айналған спортшы әрі бапкер Хабиб Нурмагомедов ұшып келгені туралы ақпарат тарады.

Не болды?

Оқиға 2026 жылдың 11 қарашасында Real American Freestyle (RAF) турнирі қарсаңында қонақүй лоббиінде болған. Мераб Двалишвили сұхбат беріп жатқанда, оның қасына жеңіл салмақтағы PFL чемпионы Усман Нурмагомедов бірнеше адаммен бірге келген. Видеода Усманның грузиялық файтерге бірдеңе айтып, содан кейін оны шапалақпен тартып жібергені көрінеді.

Бұл жағдай бірден екі тарап өкілдері арасындағы жаппай төбелеске ұласты. Кейінірек Мераб беті қан-жоса болған видеосын жариялап, онда Усман мен оның жолдастарын "жыландар" деп атады.

Кейіннен оқиғаға қатысушылар полиция бөлімшесіне жеткізілгені, ал Усман мен оның ағасы Умарға айып тағылып, жарты жылға түрмеге жабу және айыппұл төлеу туралы үкім шыққаны белгілі болды.

Айта кетейік, UFC-дің бұрынғы чемпионы Мераб Двалишвили мен Нурмагомедовтер арасындағы қақтығыс 2024 жылы өзара айыптаулардан басталған және октагондағы жекпе-жек кезінде де шешілмеген еді, ол кезде грузиялық спортшы жеңіске жеткен болатын.

Пікірлер