Хави мен Клопптың дебюті және алаңнан қуу: Ұлттар лигасының матчтері қалай өтті?

Ұлттық құрамалар арасындағы халықаралық турнир А, B және D дивизиондарында бастау алды.

Германия Нидерландыны жеңе алмады

Күннің орталық матчі деп құрамы жаңарған немістер мен голландиялықтардың кездесуін айтуға болады. Әлем чемпионатынан кейін қос команда да бапкерлерін ауыстырды: Германия тізгінін аңызға айналған Юрген Клопп ұстаса, Нидерландыға "Барселонаның" экс-жаттықтырушысы Хави келді.

Матчтегі алғашқы голды Феликс Нмеча соқты - ол 32-минутта жақын қашықтықтан қарсылас қақпашысын қапы қалдырды. Голландиялықтар тек 92-минутта ғана есепті теңестіре алды - Гакпо айып алаңындағы пасты секіріп барып, керемет соққымен түйіндеді.

Матч 1:1 есебімен аяқталды.

Роналду гол соқпады, Португалия жеңіске жетті

41 жастағы Криштиану Роналду Уэльске қарсы Ұлттар лигасы ойынында негізгі құрамда шығып, алаңда 68 минут өткізді.

Оның командасы 22-минутта есеп ашты - Жоау Феликс көзге түсті, ал 59-минутта басымдықты еселей түсуге мүмкіндік болды. Роналду айып алаңында ашылып, допты қабылдап алып, қақпашыдан айласын асырған еді, бірақ төреші офсайдқа байланысты голды есептемеді.

Ойында бұдан бөлек гол соғылған жоқ. 1:0 - Португалияның жеңісі.

Норвегиядағы голдар легі мен алаңнан қуу

Күннің ең нәтижелі матчі Норвегия мен Дания арасындағы скандинавиялық дерби болды. 25-минутқа қарай есеп 2:1 болды - Холанд пен Боббтың голдарына даттар Дамсгарттың голымен жауап қайтарды.

Екінші таймның басында Хойлунд есепті теңестіргенімен, 74-минутта Эрлинг Холанд қарсылас айып алаңында шеберлік танытып, норвегиялықтарды қайта алға шығарды.

Кездесу соңында норвегиялық Дэвид Вольф дөрекілігі үшін екінші сары қағазын алып, командасын азшылықта қалдырды.

Матч қорытындысы - 3:2, Норвегияның пайдасына.

Израиль матчіндегі күлкілі жағдай мен алаңнан қуу

Тағы бір алаңнан қуу оқиғасы Австрия мен Израиль командаларының ойынында тіркелді. Австриялықтар бірінші таймның соңында алға шыққанымен, 53-минутта израильдіктер есепті теңестіре алды.

Алайда, соғылған голға қуанудың соңы сәтсіз аяқталды - гол авторы Абу Фахри бұрыштағы жалаушаны жұлып алып, онымен ату қимылын жасады, ал төреші бұл әрекетті сары қағазбен жазалады. Бұл Фазри үшін екінші ескерту болып, ол алаңнан қуылды, нәтижесінде команда он ойыншымен қалды.

Қорытындысында Австрия құрамасы тағы екі гол соғып, матчті 3:1 есебімен жеңіспен аяқтады.

24 қыркүйекте өткен Ұлттар лигасының барлық матчтарының қорытындысы

А лигасы

• Нидерланды - Германия - 1:1;
• Сербия - Греция - 1:2;
• Норвегия - Дания - 3:2;
• Португалия - Уэльс - 1:0.

B лигасы

• Австрия - Израиль - 3:1;
• Косово - Ирландия - 1:0.

D лигасы

• Андорра - Мальта - 1:2;
• Лихтенштейн - Литва - 0:2.

Еске сала кетейік, Қазақстан құрамасы C лигасында өнер көрсетеді. 26 қыркүйекте команда жаңа маусымдағы жолын Фарер аралдарына қарсы ойынмен бастайды.

Ұлттар лигасының жаңа маусымы басталар алдында Transfermarkt порталы Қазақстан құрамасының жаңа ең қымбат футболшысын атады. Ол "Ахмат" вингері Максим Самородов болды.