Испания құрамасының аңызы мансабын аяқтады: ол “Челси” мен “Барселонада” ойнаған

39 жастағы ойыншы соңғы матчін 23 мамырда өткізді. "Пизаға" қарсы кездесуде негізгі құрамда шығып, гол соқты және алаңдағы үздіктердің бірі болды, бірақ "Лациомен" жаңа келісімшартқа отырмады.

Төрт ай бойы клубсыз жүрген ол мансабын ресми түрде аяқтау туралы шешім қабылдаған.

"Бұл – нағыз уақыты деп сеземін. Алға қадам басып, өмірімнің жаңа кезеңін бастайтын уақыт жетті. Мен өз арманыммен өмір сүргенімді және оны шындыққа айналдыруға көмектескен жандарды мақтан тұтамын. Маған осындай бақыт сыйлағаны үшін футболға рақмет", - деп жазды ол әлеуметтік желіде.

Алғашқы сағаттың ішінде-ақ оған бірнеше аңыз ойыншы қолдау білдіріп үлгерді.

"Кішіпейілділігің сені ұлы тұлғаға айналдырды! Сенің ғажайып мансабыңның бір бөлшегі болу мен үшін бақыт болды. Құттықтаймын!!! Енді отбасыңның қасында демалып, рахатқа бөлен", - деп жазды Педроның "Барселонадағы" әріптесі Хави.

"Сен – ұлысың!" - деді испаниялық қақпашы Кепа Аррисабалага.

"Аңыз Педрито!" - деп жазды Педроның "Челсидегі" бұрынғы әріптесі италиялық Давиде Дзаппакоста.

Педро деген кім?

Педро - 2008-2015 жылдар аралығында "Барселонаның" мүшесі болған. Оның еншісінде бес чемпиондық атақ, Испанияның үш кубогы және Чемпиондар лигасының үш жеңісі бар.

2009/2010 жылғы маусымда Педро бір маусым ішінде клубтық деңгейдегі барлық алты ресми турнирде кем дегенде бір гол соққан тарихтағы алғашқы футболшы атанды:

• Ла Лига;
• Испания кубогы;
• Чемпиондар лигасы;
• Испания суперкубогы;
• УЕФА суперкубогы;
• Клубтар арасындағы әлем чемпионаты.

Бұдан бөлек, Педро Каталониядан кеткеннен кейін "Челси" сапында да олжалы болды: Англия чемпионаты мен кубогын, сондай-ақ Еуропа лигасын жеңіп алды.

Сондай-ақ футболшы Испания құрамасы сапында 65 матч өткізіп, 2010 жылғы әлем чемпионаты мен 2012 жылғы Еуропа чемпионатында жеңіске жеткен.