“Қайраттың“ чемпиондар лигасындағы қарсыласына кубок финалы сенсациямен аяқталды

Португалия Кубогының финалында екінші дивизионның "Торренсе" командасымен ойнаған "Спортинг" күтпеген жерден жеңіліп, сенсация болды. Чемпиондар лигасындағы "Қайраттың" қарсыласы маусымды ешқандай олжасыз аяқтады, - деп хабарлайды Tengri Sport.

"Спортинг" аз құрамда ойнап есе жіберді

Матч Лиссабондағы (Португалия) "Жозе Алваладе" стадионында өтіп, 2:1 есебімен "Торренсенің" жеңісімен аяқталды. Жеңіс голын қосымша уақытта пенальтиден Стопира соқты.

Пенальти алдында төреші ойынды бөгегені үшін "Спортингтің" қорғаушысын алаңнан қуып, Португалияның ең атақты клубтарының біріне он ойыншымен қалып, есепті теңестіруге тура келді.

Айта кетейік, осы маусымда "Торренсе" Португалия чемпионатының екінші дивизионында өнер көрсетіп, үшінші орын алды. Қазіргі уақытта олар жоғарғы лигаға жолдама алу үшін плей-офф кезеңінде ел чемпионатының негізгі лигасының 16-орын иегерімен бақ сынасып жатыр.

Португалиялық клуб туралы не белгілі?

Бұл клуб "Спортингпен" болған ойында өзінің жүз жылдан аса тарихындағы алғашқы ірі кубогын жеңіп алды. Енді келесі маусымда алғаш рет еурокубоктарға қатысады.

Сонымен қатар, 22 мың тұрғыны бар қаланың командасы сыйымдылығы 2 мыңнан сәл ғана асатын стадионда ойнайды.

"Спортинг" "Қайратпен" ойнады

"Спортингке" келер болсақ, биыл команда чемпиондықты "Портуға" беріп қойғанымен, ел кубогының жартылай финалында басты қарсыласын жарыс жолынан шығарып үлгерді. Сондай-ақ "Спортинг" Чемпиондар лигасында сәтті өнер көрсетіп, жалпы кезеңде 7-орынмен плей-оффқа шықты.

Турнирде португалиялықтардың алғашқы қарсыласы алматылық "Қайрат" болды. Ойын 4:1 есебімен "Спортингтің" пайдасына шешілді, ал алматылықтардың 18 жастағы қақпашысы Шерхан Қалмырза кездесудің 21-минутында пенальтиден соғылған допты қайтарды.

Чемпиондар лигасының плей-офф кезеңінде лиссабондықтар 1/4 финалға дейін жетіп, болашақ финалист – лондондық "Арсеналға" жол берді.