“Келісілген матч“: Мысыр құрамасының бапкері ӘЧ-ден шығып қалғаннан кейін ФИФА-ны сынға алды

Бейнеден алынған кадрлар

Мысыр құрамасының бас бапкері Хоссам Хассан командасының Әлем чемпионатында Аргентинадан жеңілуіне ФИФА-ны кінәлады, деп хабарлайды Tengri Sport.

Мысыр құрамасының бас бапкері Хоссам Хассан 2026 жылғы Әлем чемпионатының 1/8 финалында Аргентинадан ұтылған драмалық матчтен кейін ФИФА мен төрешілер корпусына қатысты өткір сын айтты.

"Перғауындардың" тәлімгері оның командасы әділетсіз төреліктің құрбаны болғанын, ал бүкіл турнир қазіргі әлем чемпиондарының пайдасына алдын ала жоспарланған деп мәлімдеді.

"Салдарына қарамастан, ойымдағыны ашық айтамын: бұл анық келісілген матч болды және оны бүкіл әлем көрді. Егер олар Аргентинаның жеңгенін қатты қаласа, басқаларды қатыстырудың керегі не?

Әлем чемпионатының маркетингтік индустрияға айналғаны айдан анық. Олар Месси жарыстан шығып кеткенін қаламайды. Сондықтан бұл кездесуде әділдік болған жоқ. Месси босқа тойламауы керек.

Бүгіннен бастап Әлем чемпионатының бірде-бір матчін тамашаламаймын. Бұл бүгінгі әділетсіздікке қарсы наразылығым. Ойыншыларымды шын жүректен құттықтаймын. Олар ұлт қаһармандары", - деді маман матчтен кейін.

🚨Мысыр бапкері Хоссам Хассанның матч аяқталғаннан кейінгі толық сұхбаты:

"Салдарына қарамастан ойымдағыны айтамын, бұл анық қолдан жасалған ойын болды және мұны бүкіл әлем көрді"

"Тағы бір нәрсе айтқым келеді, егер олар Аргентинаның жеңгенін солай қаласа, неге бәрін шақырды..."
— Danis (@DanisMCFC) 7 шілде, 2026

Сондай-ақ Мысыр футбол федерациясы Аргентинамен матчтегі төрешілер бригадасының іс-әрекетіне байланысты ФИФА-ға шағым түсіргені белгілі болды. Мысырлық федерация есепке алынбаған даулы гол, белгіленбеген пенальти және басқа да эпизодтар өрескел заңбұзушылықтар мен төрешілердің біржақтылығын көрсетеді деп есептейді.

🚨ШҰҒЫЛ: Мысыр федерациясы Аргентинадан 2:3 есебімен жеңілген Әлем чемпионатының матчындағы төрешілік шешімдерге зерттеу жүргізуді талап етіп, ФИФА-ға ресми түрде шағым түсірді.

(Дереккөз @geglobo) pic.twitter.com/bYBirHhRkr
— Polymarket Sports (@PolymarketSport) 8 шілде, 2026 жыл

Аргентина - Мысыр: даулы матч

ӘЧ-2026 турнирінің 1/8 финалындағы қазіргі әлем чемпиондары аргентиналықтар мен Мысыр құрамасы арасындағы кездесу чемпионаттағы ең драмалық әрі даулы ойындардың біріне айналды. Матч Аргентинаның 3:2 есебімен жеңіске жетуімен аяқталды.

Instagram-дағы бұл жарияланымды көру

Selección Argentina (@afaseleccion) жазбасынан

Мысырлықтар есепті 15-минутта ашты: бұрыштамадан асырылған доптан кейін Яссер Ибрагим баспен гол соқты. Аргентиналықтар допқа иелік етуде басым болғанымен, қарсыластың тас-түйін қорғанысына тап болды. 21-минутта Лионель Мессиге пенальтиден гол соғу мүмкіндігі туды, бірақ ол оны сәтті пайдалана алмады.

Екінші таймда Мостафа Зико қарымта шабуылды голмен аяқтап, мысырлықтардың басымдығын еселеді - 0:2. Алайда 60-минутта мысырлықтардың голы VAR тексерісінен кейін есептелмеді.

Instagram-дағы бұл жарияланымды көру

Egypt National Team парақшасынан жарияланым (@egyptnt)

Аргентина матчтің соңғы бөлігінде қарқынды шабуылға көшті. 79-минутта Кристиан Ромеро Мессидің пасынан кейін есеп айырмасын қысқартты. 83-минутта Лионель Мессидің өзі таразы басын теңестірді. Ал қосымша уақытта (90+2) Энцо Фернандес кезекті пастан кейін баспен жеңіс голын соқты.

Кездесудің қорытынды есебі - 3:2.