ҚХЛ командаларының төбелесі ауыр жарақатпен аяқталды: видео

Оқиға Мәскеу мэрі кубогының финалында, айдын иелерінің пайдасына 4:1 есебі тіркеліп тұрған кезде болды.

Минск клубының қорғаушысы Николя Мелош шабуылшы Андрей Никоновтың өз командаласын итеріп жібергені үшін кек алуды ұйғарған. Ойыншылар арасында хоккейге тән төбелес басталып, Никонов күрес әдісін қолданып, қарсыласын мұзға құлатқан.

Құлаған кезде Мелоштың аяғы сәтсіз тиіп, ауыр жарақат алған. Нәтижесінде қонақтардың қорғаушысы айдыннан тек зембілдің көмегімен шығарылған.

Кездесудің қалған бөлігі шиеленісті өтіп, командалар тағы бірнеше мәрте жаппай қақтығысқа түсті.

Ойын аяқталған соң минскіліктердің жаттықтырушысы Сергей Брылин күрес әдістері қолданылған төбелес форматына көңілі толмайтынын білдіріп, Никоновтың дисквалификацияланбағанына таңғалды.

Шабуылшының өзі Минскінің "Динамо" клубы мен Мелоштан көпшілік алдында кешірім сұрады.

"Шын мәнінде бұл жағдайға қатты уайымдап отырмын. Ешқандай жарақат салғым келген жоқ. Команда қорғаушысына тезірек сауығып, мұз айдынына оралуын тілеймін", - деді ол әлеуметтік желілерде.

Еске сала кетейік, Құрлықтық хоккей лигасының (ҚХЛ) маусымы 5 қыркүйекте басталады. Астаналық "Барыс" өзінің алғашқы матчін 7 қыркүйекте өз айдынында "Сибирьге" қарсы өткізеді.

Бұған дейін қазақстандық UFC файтері Шавкат Рахмоновтың командасы оның сегізбұрышқа қайтып оралмайтыны туралы қауесеттерге жауап берген болатын.